توبەلەسكەندەردى اجىراتپاعان پوليتسەي جۇمىستان قۋىلدى

الماتى. قازاقپارات - توبەلەسكەندەردى اجىراتپاعان الماتىلىق پوليتسەي جۇمىستان قۋىلدى.

بۇل تۋرالى قالالىق ءى ءى د رەسمي وكىلى سالتانات ازىربەك حابارلادى.

بۇعان دەيىن Instagramداعى eap_kz پابليگىندە ەكى ەر ادامنىڭ جول ورتاسىندا جۇدىرىقتاسا جونەلگەن ۆيدەوسى جاريالانعان بولاتىن.

وقيعا التىن وردا بازارىنىڭ ماڭىندا بولعان. توبەلەسكەندەردىڭ ءبىرى ورتادا جول قوزعالىسىن رەتتەپ تۇرعان پوليتسەيدىڭ ارتىنا تىعىلا بەرگەن. قۇقىق قورعاۋشى ولاردىڭ ءبىرى جەرگە قۇلاپ تۇسكەندە عانا اۋىزشا ەسكەرتۋ جاساپ، جولدان كەتۋىن تالاپ ەتتى.

الايدا، ەكەۋى توبەلەسىن جالعاستىرا بەرگەن سوڭ پوليتسيا قىزمەتكەرى ودان ءارى ارالاسپادى. پوستتى وقىعان كوپشىلىك پوليتسەيدىڭ ارەكەتسىزدىگىن قاتتى سىنعا الدى.

اتالعان وقيعاعا قاتىستى قالالىق ءى ءى د تۇسىنىكتەمە بەردى.

«تارتىپتىك كوميسسيانىڭ شەشىمىمەن پوليتسيا قىزمەتكەرى قىزمەتتىك مىندەتىن دۇرىس اتقارماعانى ءۇشىن، ارەكەت ەتپەگەنى ءۇشىن، قۇقىق قورعاۋ ورگاندارىنىڭ بەدەلىنە نۇقسان كەلتىرگەنى ءۇشىن جۇمىستان قۋىلدى. ال، توبەلەسكە بايلانىستى ناۋرىزباي اۋداندىق ءى ءى ب ق ر ق ك 293-بابى بويىنشا «بۇزاقىلىق» دەرەگىمەن سوتقا دەيىنگى تەرگەۋ امالدارى ءجۇرىپ جاتىر»، - دەدى ءى ءى د رەسمي وكىلى س. ازىربەك.

ونىڭ ايتۋىنشا، توبەلەسكە جول قوزعالىسىنىڭ باسقا قاتىسۋشىلارى دا بەيتاراپتىق تانىتقان.

اۆتور: گۇلميرا عوسمانالي