مەدەۋ ارىنبايەۆ بىرنەشە جىلدان بەرى ۇيلەنبەي ءجۇرۋىنىڭ سىرىن اشتى
مەدەۋ ارىنبايەۆ جاقىندا عانا اناسىنان ايىرىلىپ قالدى. ەر جەتكەن ۇلى مەن 10- سىنىپقا كوشكەن ۇلىن قازىر جالعىز تاربيەلەپ جاتىر.
- مەدەۋ اعا، قالىڭىز قالاي؟ شىعارماشىلىق جاڭالىقتاردان باستاساق...
- جاعدايىم شۇكىر، جاقسىمىن. جاڭا اندەر جازىلىپ، ومىرگە دەگەن كوزقاراس وزگەرۋدە. بۇعان دەيىن اندەرىمدە مۇڭ مەن قايعى، ساعىنىش پەن جابىعۋ بولسا، قازىر پوزيتيۆتى باعىتتا باعىمدى سىناپ ءجۇرمىن. جاڭا اندەرىم جاقىن كۇندەرى تىڭدارمانعا جول تارتقالى تۇر.
- اناڭىزدىڭ ارتى قايىرلى بولسىن. تۋماق بار دا، ولمەك بار ەكەنىن بىلسەك تە اناڭىزبەن قوشتاسۋ وڭاي بولماعان شىعار...
- ول راس. اۋىر سوققى بولدى. جارىم ايگۇل ومىردەن وتكەن سوڭ انام بىردەن قولىما كەلىپ تۇردى. جارىمنىڭ جوقتىعىن سەزدىرمەي، ۇيىمىزگە جارىق ساۋلەدەي بولدى. مەن انام قولىما كەلگەن ساتتەن باستاپ ءسابي قالپىما ەندىم. ۇل - قىزىم اپالارى ارقىلى جاندارىنا جۇبانىش تاپقان ەدى. وكىنىشتى... ءبىراق، تاعدىردىڭ ىسىنە شارامىز جوق. انامىز ءۇشىن دە، اسىل جارىم ءۇشىن دە دۇعا ەتىپ، قۇران وقىپ، جانناتتان ورىن تىلەيمىز.
- ءامين. ەسكى جارانى قازبالادى دەمەڭىز الايدا كەلەسى ساۋال مارقۇم جارىڭىزعا تىكەلەي قاتىستى بولماق. دۇنيەدەن وتكەنىنە التى جىلداي ۋاقىت بولىپتى. قايتا ۇيلەنۋ ويىڭىزعا كەلمەدى مە؟
- بۇل سۇراق مەنىڭ زىعىرىمدى شىعاردى دەسەم دە بولادى. تۋما - تۋىس، دوس - جاران، ءتىپتى جاي عانا بۇگىن تانىسقان داستارحانداستىڭ ايتاتىنى «جالعىزدىق قۇدايعا جاراسقان. ۇيلەنۋ كەرەك. قاشان ۇيلەنەسىڭ؟» دەگەن اڭگىمە. ۇيلەنۋ ۇلكەن جاۋاپكەرشىلىك.
ءۇستىرتىن قاراۋعا بولمايدى. ۇيلەندىڭ بە، ەركەكتىك ۋادەڭدە تۇرىپ، جارتىڭنىڭ باقىتى ءۇشىن كۇرەسۋ دەگەن ءسوز. شىنىمدى ايتسام، بۇرىننان مىنەزىم اۋىر. مەنىڭ مىنەزىمە تەك مارقۇم جارىم عانا شىدايتىن. ول كىسى ومىردەن وتكەن سوڭ تاعدىردىڭ توسقاۋىلدارىنا توتەپ بەرەم دەپ ءبىراز جۇيكەمنىڭ جۇقارعانىن دا جاسىرمايمىن.
سوندىقتان، مىنەزىمە شىدايتىن ادامدى كەزدەستىرمەدىم. التى جىلدا ەشكىمدى ۇناتپادىم دەسەم ەشكىم سەنبەس. ارينە، كوز بەن كوڭىلگە ۇناعان ارۋلار بولدى. ءبىراق مىنەزدەرىمىز كەلىسپەدى. ءسوزىمىز جاراسپادى.
ونىڭ ۇستىنە كوزدەرى مولدىرەپ قالعان ۇل - قىزىمنىڭ ەرتەڭىن ويلادىم. ەگەر ولارعا بوگدە بىرەۋ «اي» دەپ شەكەسىنەن شەرتەتىن بولسا، ەشقاشان كەشىرمەس ەدىم. سوندىقتان، ءوزىمدى ويلاپ وزگەلەردىڭ باقىتتارىنا كەدەرگى بولعىم كەلمەدى.
- الايدا، قازىر ۇل-قىزىڭىز ءوسىپ، ەر جەتىپ، بوي جەتتى. ەكىنشى رەت ۇيلەنۋىڭىزگە قارسى ەمەس شىعار؟
- ءيا، قازىر ۇلىم مەكتەپ ءبىتىرىپ، جوعارى وقۋ ورنىنا تاپسىرىپ جاتىر. ال، قىزىم 10- سىنىپقا تابان تىرەدى. 2-3 -جىلدا «اكە، مەن ۇيلەنەمىن» دەيتىن جاسقا جەتەدى. ارينە، ۇيدە كەز-كەلگەن تاقىرىپتا سويلەسەمىز. اقىلداسامىز.
ءبىراق، مەن ءۇشىن ءالى كىشكەنتاي. سوندىقتان، ۇيلەنۋ تۋرالى اسا اۋقىمدى تاقىرىپ قوزعادىم دەپ ايتا المايمىن. ارينە، ەگەر ويىمداعى ادامدى كەزدەستىرسەم بالالارىم ءتۇسىنىپ، قولدايدى دەپ سەنەمىن. شىنى كەرەك، بۇعان دەيىن ۇيدە انام جانىمدا بولعان كەزدە ءبارى دايىن.
ءبارى ورىندا ەدى. انامىز دۇنيەدەن وتكەلى بەرى ۇيدە ايەل ادامنىڭ جەتىسپەيتىنى بايقالىپ ءجۇر. ارينە، ۇيگە ايەل كەرەك دەپ ۇيلەنە سالۋ ويىمدا جوق. ەگەر ۇناتىپ، كوڭىلىم قالاپ جاتسا نەگە ۇيلەنبەسكە... ءبىراق، ول ۋاقىتتىڭ ەنشىسىندە.
- ەندەشە، اعا ۋاقىتىڭىزدى ءبولىپ سىرلاسقانىڭىزعا راحمەت. بولاشاقتا ءسۇيىنشى جاڭالىقتارىڭىز بولسا، وقىرمانمەن ءبىرىنشى بولىسەسىز دەپ سەنەمىز. اللا وتباسىڭىزعا باقىت پەن بەرەكە ءناسىپ ەتسىن.
Stan.kz