رەسەيدە ەل استاناسىن اۋىستىرۋ ۇسىنىلدى
10:31, 21 - تامىز 2017
استانا. قازاقپارات - رەسەي فەدەراتسياسىنىڭ استاناسىن اۋىستىرۋ تۋرالى ۇسىنىس جاسالدى. جەكسەنبى، 20 -تامىز كۇنى «ءبىرتۇتاس رەسەي» پارتياسى جوعارعى كەڭەسىنىڭ مۇشەسى، ساياسي جانە ەكونوميكالىق كوممۋنيكاتسيالار اگەنتتىگىنىڭ ديرەكتورى دميتري ورلوۆ Facebook-تەگى ءوز پاراقشاسىندا جاڭا استانا بولۋعا بارىنشا لايىقتى نۇسقا ەكاتەرينبۋرگ ەكەندىگىن جازدى، دەپ حابارلايدى قازاقپارات.
«ماسكەۋ رەسەيدىڭ گەوگرافيالىق ورتالىعىنان الىس ورنالاسقان، ال ونىڭ دامۋى ماسكەۋ اگلومەراتسياسىنىڭ گيپەرتروفياسىنا الىپ كەلۋدە. وسى ەكى فاكتىنىڭ ءوزى رەسەي استاناسىن ۋرالعا، پوۆولجەگە نەمەسە باتىس سىبىرگە اۋىستىرۋ تۋرالى ءسوز قوزعاۋعا جەتكىلىكتى»، - دەپ سانايدى ساياساتكەر.
ونىڭ پىكىرىنشە، «اناعۇرلىم دۇرىس شەشىم» - ەكاتەرينبۋرگ. بۇل رەتتە ورلوۆ استاناعا جۇكتەلگەن فۋنكسيالاردىڭ ءبىر بولىگىن باسقا قالالارعا بەرۋگە بولاتىنىن اتاپ ءوتتى.
ايتا كەتەيىك، 19 -تامىز كۇنى دەموگرافيا، كوشى-قون جانە وڭىرلىك دامۋ ينستيتۋتى قاداعالاۋ كەڭەسىنىڭ ءتوراعاسى يۋري كرۋپنوۆ ۆلاديمير پۋتينگە «ماسكەۋدەن الىستاتۋ دوكتريناسىن» جولداپ، وندا ەل استاناسىن ۋرالدان ءارى ورنالاستىرۋ ۇسىنىسىن ايتقان بولاتىن.