قانات يسلام باستاعان التى بوكسشى جانكۇيەرلەرىنە ارناپ اشىق جاتتىعۋ وتكىزدى - كەسكىن
اشىق جاتتىعۋ كەشىنە قانات يسلامنان وزگە جانقوش تۇراروۆ، جانىبەك ءالىمحان ۇلى، رۋسلان مىرساتايەۆ، ايدوس ەربوسىن ۇلى، نۇرسۇلتان جاڭابايەۆتار استانا تۇرعىندارى مەن قوناقتارىنا 9 -قىركۇيەك كۇنى وتەتىن بوكس كەشىنە قالاي دايىندالىپ جاتقاندىقتارىن كورسەتتى.
اشىق جاتتىعۋعا اتالعان بوكسشىلاردىڭ سپاررينگ ارىپتەستەرى ماريو مينا، يۋنەسكي گونسالەز جانە لۋيس كاستيللو قاتىستى. ءار بوكسشى جەكە-جەكە ءوز ونەرلەرىن كورسەتىپ، سپاررينگ قارسىلاستارىمەن جەكپە-جەككە شىقتى. شارا اياسىندا بوكسشىلار جانكۇيەرلەرىنە ارناپ اكەلگەن سىيلىقتارىن بەرىپ، بىرگە سۋرەتكە ءتۇستى.
سونداي-اق، جانكۇيەرلەرىنە قولتاڭبا بەرىپ، بىرگە سۋرەتكە ءتۇستى. ەسكە سالايىق، 9 -قىركۇيەك كۇنى استاناداعى «سارى ارقا» ۆەلوترەگىندە جوعارىدا اتى اتالعان جانە وزگە دە بوكسشىلارىمىز «ەكسپو-2017» كورمەسى اياسىندا وتەتىن بوكس كەشىندە ونەر كورسەتەدى. باستى جەكپە- جەك قانات يسلام مەن (24-0,19 ك و) كانادالىق برەندون كۋكتىڭ (18-0, 11ك و) اراسىندا وتەدى. بوكسشىلار ءبىرىنشى ورتا سالماقتاعى IBF تيتۋلىنا ۇمىتكەرلىككە تالاسادى.
سونداي-اق وسى جەكپە-جەكتىڭ اندەركارتىندا قازاقستاندىق 8 بوكسشى شارشى الاڭعا شىعادى. ولار: جانقوش تۇراروۆ (21-0, 15ك و)، جانىبەك ءالىمحان ۇلى (1-0, 1ك و)، مەيىرىم نۇرسۇلتانوۆ (3-0,2ك و)، رۋسلان مىرساتايەۆ (3-0, 3ك و)، ءالي احمەدوۆ (7-0,5ك و)، ايدوس ەربوسىن ۇلى (6-0, 6ك و)، ديماش نيازوۆ (11-0-3, 5ك و) جانە نۇرسۇلتان جاڭابايەۆ.
اۆتور: كۇنسۇلتان وتارباي