استانادا اۋدارىسپاقتان حالىقارالىق تۋرنير جەڭىمپازدارى انىقتالدى - فوتو
ق ر ۇلتتىق سپورت تۇرلەرى قاۋىمداستىعىنىڭ حابارلاۋىنشا، ءتورت سالماق دارەجەسىندە وتكىزىلگەن بايراقتى باسەكەنىڭ باس جۇلدەسىن وتانداستارىمىز ءوز قانجىعاسىنا بايلاعان.
17- تامىز كۇنى 80، 90 جانە 90 كەلىدەن جوعارى سالماق دارەجەسىندە جۇلدەلەر ساراپقا سالىندى. 80 كەلى سپورتشىلار اراسىندا قازاقستاندىق ەسىمحان ءراحماتىللا جەڭىمپاز اتاندى، مونعوليانىڭ بايان-ولگەي ايماعىنىڭ باس بالۋانى جەڭىسبەك سەرىك ۇلى - ەكىنشى ورىندى، قىتايلىق قانداسىمىز مۇقات قۋانىش ۇلى ءۇشىنشى ورىندى يەلەندى.
90 كەلى سالماق دارەجەسىندەگى بەلدەسۋدە، ەل نامىسىن قورعاعان سىرىم ءىزباساروۆ - باس جۇلدەنى، مونعوليالىق قانداسىمىز باقىتبەك اقبي - «كۇمىستى»، قىرعىزستاندىق ماراتبەك التىمىشيەۆ قولا جۇلدەنى جەڭىپ الدى. 90 كەلىدەن جوعارى سالماقتا وتانداسىمىز ءبىرجان قوساليەۆ قارسىلاس شاق كەلتىرمەدى.
ال كۇمىس جۇلدەنى قىتاي كومانداسىنىڭ بالۋانى سەرىك ۇسەن، قولا جۇلدەنى مونعوليالىق دوسجان بايىس جەڭىپ الدى. 18- تامىز - تۋرنيردىڭ ەكىنشى كۇنىندە «تۇيە بالۋان» سالماق دارەجەسىندەگى بەلدەسۋلەر ءوتتى. بۇل ساناتتا 5 مەملەكەتتىڭ - قازاقستان، قىتاي، موڭعوليا، رەسەي جانە ماجارستاننىڭ 18 سپورتشىسى باق سىنادى.
ناتيجەسىندە، قازاقستاندىق ءبىرجان قوساليەۆ جەڭىسكە جەتىپ، ءتۋرنيردىڭ باس جۇلدەسى «تۇيە بالۋان» بەلبەۋىنە يە بولدى.
ايتا كەتەيىك، ءتۋرنيردىڭ جەڭىمپازدارىن ماراپاتتاۋ راسىمىنە ق ر ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان قاتىستى. 80، 90 جانە 90 كەلىدەن جوعارى سالماق ساناتتارىنداعى جەڭىمپازدارعا - 700 مىڭ، ەكىنشى جانە ءۇشىنشى ورىندارعا، سايكەسىنشە 500 جانە 200 مىڭ تەڭگە كولەمىندە سىياقى بەرىلدى. «تۇيە بالۋان» يەگەرى ءبىرجان قوساليەۆقا 1 ميلليون تەڭگە تابىستالدى.