قازاقشاعا سۋداي امەريكالىقتار استانادان سويلەسەتىن ادام تاپپاي قينالدى
ولاردىڭ قازاقشا سۇراعىنا كوپشىلىگى ورىس تىلىندە جاۋاپ قاتقان دەپ حابارلايدى«ازاتتىق» سايتى.
امەريكالىق كريس ريز بەن گابريەل ماكگاۋيەردىڭ قازاقشاسى جامان ەمەس. ەكەۋى ينديانا ۋنيۆەرسيتەتىندەگى ءتىل ۇيرەتەتىن كوپ كۋرستىڭ ىشىنەن قازاق ءتىلىن تاڭداپ العان. گابريەلدى اسىرەسە قازاق تىلىندەگى كىرمە سوزدەر قىزىقتىرعان.
«قازاق تىلىندەگى ەڭ قىزىق سوزدەر باسقا تىلدەن ەنگەن سوزدەر. مىسالى اراب تىلىنەن، اعىلشىن تىلىنەن، موڭعولشادان ەنگەن سوزدەر»، - دەيدى ول.
كريس پەن گابريەل قازاقستان استاناسىندا قازاقشا سويلەيتىن ادام تاپپاي قالاتىنىنا قىنجىلادى. ايتۋلارىنشا، قازاقشالارىن جەتىلدىرىپ، قازاقشا امانداسسا دا، مۇنداعى جۇرت ورىسشا جاۋاپ قاتۋعا اۋەس.
«بايقاۋىمشا جەرگىلىكتى جۇرت شەتەلدىك كورسە، ورىسشا سويلەسەدى. سوندىقتان الدەبىرەۋمەن قازاقشا امانداسا قالسام، ول ادەتكە سالىپ ورىسشالاي جاۋاپ قاتادى. ال ونداي جاۋاپ ماعان قيىنعا تۇسەدى. سەبەبى ورىسشام ناشار»، - دەيدى گابريەل.
كريس ريز استانادان قاراعاندا، اقتوبەدە قازاقشا سويلەيتىن حالىقتىڭ كوپ ەكەنىن ايتادى.
«جاز بويى مەن استانادا ەشكىممەن قازاقشا سويلەسكەن جوقپىن. اقتوبەگە بارىپ كەلدىم. ول جاقتا قازاقشا كوپ ەستىدىم»، - دەيدى ول.
نازاربايەۆ ۋنيۆەرسيتەتىنىڭ تۇركولوگيا جانە قازاق ءتىلى كافەدراسىنىڭ ديرەكتورى يۋلي شاميلوگلۋنىڭ ايتۋىنشا، استانالىقتاردىڭ قازاقشا سويلەپ كەتۋىنە پسيحولوگيالىق كەدەرگىلەر بار.
«بۇرىنعى كەڭەس وداعىنىڭ تۇرعىندارىنىڭ بويىندا الدەبىر پسيحولوگيالىق كومپلەكس بار. ولار قازاق ءتىلىن ۇيرەنۋدى قيىن كورەدى. شەتەلدىكتەرگە ەش قيىن ەمەس»، - دەيدى عالىم.