ماقپال ءجۇنىسوۆا وزىنە بولات نازاربايەۆتىڭ نە سەبەپتى دەمەۋشىلىك جاسايتىنىن ايتتى
«جۇلدىزدار وتباسى» جۋرنالىنا بەرگەن سۇحباتىندا ءانشى وسى سۇراققا قاتىستى جاۋاپ بەردى.
«سەنىڭ قىزىڭا وكىل اكە بولايىن» دەپ ءوزى ۇسىنىس بىلدىرگەن. ول كىسىنىڭ جاساعان جاقسىلىعىن ەشقاشان ۇمىتپايمىن. مەن دە بوكەڭنىڭ قۋانىشتارىنا قالماي بارامىن. جالپى، بوكەڭ دوس بولۋعا، سىيلاسۋعا لايىقتى ادام. ول جالعىز ماعان ەمەس، ونەر ادامدارىنىڭ بارلىعىنا كومەكتەسەدى. قاراساي اۋدانىنىڭ بۇكىل انشىلەرىنە ءبىر-ءبىر ماشينا، ءۇي الىپ بەرگەن. بيبىگۇل تولەگەنوۆاعا دا، ەسكەندىر حاسانعاليەۆكە دە، روزا رىمبايەۆاعا دا كومەكتەسەدى. ءبىراق، بۇل جايىندا ول كىسىلەر ايتپايدى. ال مەن اشىق ايتا بەرەمىن. سوندىقتان ەلدەرگە بوكەسى تەك ماعان كومەكتەسىپ جاتقانداي كورىنەدى»، - دەيدى ول.
ءانشى جارى زامانبەك ءنۇرقادىلوۆتىڭ كوزى تىرىسىندە دە بولات نازاربايەۆپەن قارىم-قاتىناستارىنىڭ جاقسى بولعانىن ايتتى.
«زاكەڭدە ول كىسىگە ۇنەمى اعالىق قامقورلىعىن كورسەتىپ، اقىلىن ايتىپ جۇرەتىن. نەگىزى بوكەڭ (بولات نازاربايەۆ- رەد) ساياساتتىڭ ەمەس، بيزنەستىڭ ادامى. تۇسىنە بىلگەن ادامعا، اقشا تابۋدىڭ ءوزى ۇلكەن ونەر. ەشقاشان وڭايلىقپەن اقشا كەلمەيدى. وعان دا باس كەرەك، ەڭبەك ەتۋ كەرەك. دۇرىس ءجۇرىپ-تۇرۋ كەرەك دەگەن سياقتى. بوكەڭ سونىن بارلىعىن مەڭگەرە بىلگەن ادام. ءوزى قايىرىمدىلىقتى كوپ جاسايدى. بالالار ۇيىندەگى 100 بالانى ءوزىنىڭ قامقورلىعىنا الىپتى. ۇلكەن مەتسەنات سياقتى عوي. ول قارا باسىنىڭ قامى ءۇشىن جۇرگەن ادام ەمەس»، - دەيدى ماقپال.
ول سونىمەن قاتار بولاتتىڭ وتە جومارت جان ەكەنىن جانە قايىرىمدىلىقپەن ءجيى اينالىساتىنىن اتاپ ءوتتى.
«مىرزالىعى باسىم. مەن ول كىسىنى «مىرزا جىگىت» دەيمىن. جان-جاعىنداعى ادامداردىڭ بارلىعىنا ۇنەمى كومەكتەسىپ جۇرەدى. ونىڭ وتباسىمەن ءالى ارالاسىپ تۇرامىن. ۇيىندەگى بايبىشەنىڭ رۋى - ارعىن. سوندىقتان «اپام» دەپ ايتامىن. دۇشپان رەتىندە ءبىزدىڭ سىيلاستىعىمىزدى باسقاشا كورگىسى كەلەتىندەر، باسقاشا تۇسىنگىسى كەلەتىندەر بار. ءبىراق مەن سول دۇشپاندىقتىڭ ءجىبىن ۇزگىم كەلەدى. دۇشپان بولماي، دوس بولۋ كەرەك»، - دەيدى ماقپال.
ەسكە سالساق، ماقپال بولات نازاربايەۆتىڭ وزىنە قىمبات كولىك سىيعا تارتىپ، قارجىلاي كومەكتەسىپ تۇراتىنىن ايتقان.