جاراتىلىسى وزگەشە سپورتشى قىز بۇكىلالەمدىك سپورت دوداسىنان جۇلدەمەن ورالدى - ۆيدەو
اۋەسقوي سپورتشى قىزدىڭ جاراتىلىسى وزگەشە بولسا دا، مىنەزىنىڭ قايسارلىعى تاڭعالدىردى. گۋزال - 4 جىل سايىن وتەتىن بۇكىلالەمدىك سپورت جارىسىنا ەلىمىزدىڭ اتىنان قاتىسقان جالعىز اۋەسقوي سپورتشى. 5 جاسىنان باستاپ سپورتتى جانىنا سەرىك ەتكەن ول جۇزۋدەن حالىقارالىق دارەجەدەگى سپورت شەبەرى يرينا لازاريەۆادان ءتالىم الادى. حالىقارالىق جارىس تۋرالى عالامتوردان وقىپ ءبىلىپتى.
گۋزال ەرگەشەۆا، اۋەسقوي سپورتشى:
- سپورت جارىسىنىڭ اشىلۋ سالتاناتىندا جالعىز بولعانىما كوڭىلىم قۇلازىعانى راس. الايدا ەلىمىزدىڭ ءانۇرانى ورىندالعاندا كەۋدەمدى قۋانىش كەرنەپ، كوڭىلىمە قانات ءبىتتى. قازاقستاننىڭ اتىنان شىعىپ تۇرعاندىقتان، جاۋاپكەرشىلىكتى دە سەزىندىم.
جاتتىعۋ زالىندا توككەن تەر دالاعا كەتپەدى. 22 ەلدىڭ وكىلدەرى قاتىسقان جارىستا گۋزال 25 جانە 50 مەترگە جۇزۋدەن ەكى كۇمىس مەدال جانە كوماندالىق قۇرامدا قولا جۇلدەگە قول جەتكىزدى. ال پاۋەرليفتينگتەن قانجىعاسىنا التىندى بايلادى.
گۋزال ەرگەشەۆا، اۋەسقوي سپورتشى:
- مەن كاسىبي سپورتشى ەمەسپىن. جارىسقا قاتىسۋشىلاردىڭ بۇرىنعى ناتيجەلەرىمەن تانىسىپ، باسەكەلەستەرىمنىڭ وسال ەمەس ەكەنىن ءبىلدىم. سوندىقتان جەڭىسكە جەتپەسەم دە، ەلىمىزدىڭ اتىنان قاتىسۋدىڭ ءوزى ابىروي دەپ ويلادىم. الايدا ساتتىلىك سەرىك بولىپ، جارىستا باعىم جاندى.
گۋزالدىڭ كوپشىل بولىپ وسۋىنە اتا- اناسىنىڭ ىقپالى زور. كوپ جىل بۇرىن دارىگەرلەر سيرەك كەزدەسەتىن دياگنوزبەن تۋىلعان قىزدارىنان باس تارتۋدى ۇسىنىپتى. ءبىراق ىرىسقۇل اعامەن ءنازيرا اپاي قىزدارىنىڭ قوعامنان بولەكتەنبەي، ەركىن وسۋىنە بار كۇش-جىگەرلەرىن جۇمساعان. ايتا كەتەيىك، گۋزالدىڭ اكەسى اۋىر اتلەتيكادان سپورت شەبەرى بولسا، اناسى ۆولەيبولمەن اينالىسقان.
ىرىسقۇل ەرگەشەۆ، گۋزالدىڭ اكەسى:
- بالا كەزدەن باستاپ وعان دەنە بىتىمىندە اۋىتقۋى بار ۇلى ادامداردىڭ ءومىر تاريحى تۋرالى كوپ ايتىپ بەرەتىنبىز. بۇل قىزىمىزدىڭ تاربيەسىنە كوپ اسەر ەتتى. ونىڭ ۇستىنە ءوزى دە قايسار بولىپ ءوستى. سپورتقا دەگەن قۇلشىنىسى ونى ارمانىنا جەتكىزدى.
گۋزال اعىلشىن ءتىلىن ەركىن مەڭگەرگەن. قازاقستاندىق جاستاردىڭ شەتەلدە ءبىلىم الۋىنا جول كورسەتەتىن ءبىلىم ورتالىعىندا جۇمىس ىستەيدى. سپورت جارىسىنان قاناتتانىپ كەلگەن ول ەلىمىزدەگى ءوزى سياقتى جانداردىڭ سپورتپەن اينالىسۋىنا كۇش سالماق.