اۆستراليا ساياساتكەرى نارازىلىق بەلگىسى رەتىندە جۇمىسقا بۋركا كيىپ كەلدى - فوتو
ساياساتكەر مۇسىلمان ايەلدەرگە اياق-قولدارىن جاۋىپ كيىنۋگە تىيىم سالۋ جونىندەگى كامپانيا شەڭبەرىندە ءوزىنىڭ كوزقاراسىن وسىلايشا بىلدىرگىسى كەلگەن. ونىڭ بۇل قىلىعى ۇكىمەت جانە مۇسىلماندار قاۋىمى تاراپىنان ۇلكەن سىنعا ۇشىرادى.
حانسون سەناتتاعى ءوز ورنىندا 20 مينۋتتاي ۋاقىت بۋركامەن بۇركەنىپ وتىرعاننان كەيىن ونى شەشىپ تاستادى، دەپ حابارلايدى Reuters. سودان كەيىن سەناتور ۇلتتىق قاۋىپسىزدىك تۇرعىسىنان مۇنداي كيىمدەردى كوپشىلىك الدىنا كيىپ شىعۋعا تىيىم سالۋعا شاقىرىپ، ءسوز سويلەدى. «مەن ۇستىمنەن مۇنداي كيىمدى شەشىپ تاستاعانىم ءۇشىن ءوزىمدى شەكسىز باقىتتى سەزىنەمىن، سەبەبى بۇل پارلامەنتتە ورىنسىز بولار ەدى»، - دەپ مالىمدەدى ول ءوز ارىپتەستەرىنە.
«ەگەر كىمدە-كىم بالاكلاۆا نەمەسە شاڭعى ماسكاسى - كوزگە، اۋىزعا نەمەسە بەتكە ارنايى تەسىك قالدىرىپ، باستى، ماڭدايدى جانە بەتتى جاۋىپ تۇراتىن توقىلعان باس كيىم نەمەسە شلەم كيىپ الىپ بانككە نەمەسە باسقا عيماراتقا كىرەتىن بولسا، تەز ارادا ول جەردەن شىعارىلۋى ءتيىس. مۇنداي جايت نەگە باستان- اياق بۇركەنىپ العاندارعا نەگە قولدانىلماسقا؟» - دەپ سۇرادى «ءبىر ۇلت» پارتياسىنىڭ كوشباسشىسى.
اۆستراليانىڭ باس پروكۋرورى دجوردج برانديس حانسوننىڭ بۇل قىلىعىن قاتتى سىنعا الىپ، ونىڭ بۇل ارەكەتى وزىنە كەرى ىقپالىن تيگىزۋى مۇمكىن ەكەندىگىن ەسكەرتتى. «ءسىزدىڭ يسلام ءدىنىن ۇستانبايتىنىڭىزدى ءبىز ءبارىمىز جاقسى بىلەمىز. مەن باسقا اۆستراليالىقتاردىڭ ءدىني سەنىمدەرىنە قاتىستى كەمسىتىپ قورلاۋدا اسا ساق بولۋىڭىزعا كەڭەس بەرەر ەدىم»، - دەدى ول.
ۆيكتوريا شتاتى يسلام كەڭەسىنىڭ ۆيتسە-پرەزيدەنتى ادەل سالمان حانسوننىڭ ارەكەتىن «ونىڭ قىزمەتتىك لاۋازىمىن كەلەكە ەتۋ» دەپ اتادى. «بۇل كوڭىل قالدىرارلىق ءىس، ءبىراق ەش تاڭداندىرمايدى، سەبەبى ول يسلام ءدىنىن قايتا-قايتا كەمسىتەدى»، - دەدى مۇسىلماندىق ورگان باسشىسىنىڭ ورىنباسارى.
حانسون پارتياسىن قازىرگى قۇرامدا ءتورت سەناتور قۇرايدى. بۇل «ءبىر ۇلت» پارتياسىنىڭ پارلامەنتتە داۋلى باستامالارعا داۋىس بەرۋگە ىقپال ەتۋگە مۇمكىندىك بەرەدى. حانسون ساياساتقا العاش رەت 1990-جىلدارى ارالاسىپ، ازيادان كوشى-قون مەن بوسقىندارعا قارسى تۇبەگەيلى قارسىلىق كورسەتۋ باستاماسىن كوتەرگەن بولاتىن. سوڭعى جىلدارى سەناتور يسلام دىنىندەگى ايەلدەردىڭ كيىمدەرىنە جانە مەشىتەر سالۋعا قارسى كامپانيانى جۇرگىزۋدە.
بۋركا - كوزگە ارنالعان تەسىگى جۇقا تورلى ماتامەن جابىلعان جانە بۇكىل دەنەنى جاۋىپ تۇراتىن ايەلدەرگە ارنالعان كيىم. بۋركانى كەيبىر يسلام ەلدەرىندە پايدالانادى.
دەرەككوزى: https://www.newsru.com