پان گي مۋن قازاق-كورەي بىرلەسكەن قايىرىمدىلىق قورىنا قولداۋ كورسەتپەك

اقتوبە. قازاقپارات - اقتوبەدە «اقتوبە- سيەۆەرانس» قايىرىمدىلىق قورى قۇرىلدى.

قورعا ب ۇ ۇ بۇرىنعى باس حاتشىسى پان گي مۋن قولداۋ كورسەتەتىن بولادى، دەپ حابارلايدى قازاقپارات ءتىلشىسى.

اقتوبەگە وڭتۇستىك كورەياداعى ەنسە ۋنيۆەرسيتەتىنىڭ «سيەۆەرانس» گوسپيتالى مەن «سيەۆەرانس KZ»  حالىقارالىق مەديتسينالىق قورىنىڭ دەلەگاتسياسى كەلدى. دەلەگاتسيا اقتوبە وبلىسىنىڭ اكىمى بەردىبەك ساپاربايەۆپەن كەزدەسىپ، بىرلەسكەن قور قۇرۋعا شەشىم شىعاردى. بۇل قور جەرگىلىكتى دارىگەرلەردىڭ تاجىريبە جيناپ، يننوۆاتسيالىق ادىستەردى ۇيرەنۋىنە مۇمكىندىك بەرمەك. سونىمەن قاتار، شەبەرلىك ساباقتارى وتكىزىلىپ، كورەيا دارىگەرلەرى ناۋقاستارعا كەڭەس بەرەدى، جەدەل مەديتسينالىق كومەك كورسەتەدى. اقتوبەنىڭ دەنساۋلىق ساقتاۋ جۇيەسىن جەتىلدىرۋگە باعىتتالعان قورعا بۇۇ بۇرىنعى باس حاتشىسى پان گي مۋن قولداۋ كورسەتەتىن بولدى.

«سىزدەر باتىس قازاقستاندىق مەديتسينالىق كلاستەرىنىڭ قالىپتاسۋىنا ۇلكەن ۇلەس قوسقان ستراتەگيالىق، حالىقارالىق سەرىكتەس بولدىڭىزدار. سىزدەردىڭ كومەكتەرىڭىزدىڭ ارقاسىندا وبلىستىڭ ونداعان دارىگەرى كورەيانىڭ جەتەكشى ەمحانالارىنان تاجىريبەدەن ءوتتى، ترانسپلانتاتسيا بويىنشا جوعارى كاسىبي وتالاردى جاساۋ باستالىپ، ويداعىداي جۇرگىزىلۋدە. ەندى ءبىزدىڭ سەرىكتەستىگىمىز جاڭا باعىتتا دامىپ كەلەدى»، - دەدى اقتوبە وبلىسىنىڭ اكىمى بەردىبەك ساپاربايەۆ.

كەزدەسۋ كەزىندە ءۇشجاقتى مەموراندۋمعا قول قويىلدى. ەنسە ۋنيۆەرسيتەتىنىڭ قۇرمەتتى رەكتورى، ەنسە ۋنيۆەرسيتەتىنىڭ قوعامدىق- الەۋمەتتىك كومەك حالىقارالىق ينستيتۋتىنىڭ ديرەكتورى پان گي مۋن ارنايى سالەمحات جولداپ، «اقتوبە- سيەۆەرانس» قايىرىمدىلىق قورىن قۇرۋ باستاماسىنا قولداۋ كورسەتەتىنىن جەتكىزگەن.