تاياۋدا حالىقارالىق ستراتەگيالىق زەرتتەۋلەر ينستيتۋتى پحەنيان سوڭعى سىناعان بالليستيكالىق زىمىراندارىندا قولدانعان قوزعالتقىشتاردى ۋكراينا نەمەسە رەسەي زاۋىتتارىنىڭ «قارا بازارىنان» العان بولۋى مۇمكىن ەكەنىن حابارلاعان بولاتىن. ءبىراق ۋكراينا سولتۇستىك كورەياعا قانداي دا ءبىر زىمىران تەحنولوگياسىن بەرگەنىن جوققا شىعارعان.
New York Times گازەتى 14- تامىزدا ا ق ش بارلاۋ قىزمەتىنىڭ شەنەۋنىكتەرى پحەنيان زىمىران قوزعالتقىشتارىن ۋكرايناداعى قىرعي-قاباق سوعىسى كەزەڭىندەگى زاۋىتتان العان بولۋى ىقتيمال دەپ ويلايتىنىن حابارلاعان ەدى.
Reuters ءسوزىن كەلتىرگەن ا ق ش بارلاۋ قىزمەتى شەنەۋنىكتەرىنىڭ ءبىرى «ءبىز سولتۇستىك كورەيا يمپورتقا تاۋەلدى ەمەس دەپ سانايمىز. كەرىسىنشە، ولار زىمىران قوزعالتقىشتارىن وزدەرى جاساۋعا شاماسى جەتەدى دەپ ويلايمىز» دەگەن.
ت ا س س اگەنتتىگى دە ا ق ش بارلاۋ قىزمەتىنىڭ شەنەۋنىكتەرى سولتۇستىك كورەيا زىمىران قوزعالتقىشتارىن ءوزى جاساي الاتىنىنا سەنىمدى ەكەنىن حابارلادى.
ا ق ش مەملەكەتتىك دەپارتامەنتىنىڭ وكىلى حيزەر ناۋەر ۋكراينانىڭ «جاپپاي قىرىپ-جويۋ قارۋلارىن تاراتپاۋ مىندەتىن بۇلجىتپاي ورىندايتىنىن» ايتىپ، كيەۆتىڭ پحەنيانعا زىمىران تەحنولوگياسىن بەرگەنىنە كۇمان كەلتىردى.