ساراپشىلار الماتىدا وتكەن قىسقى ۋنيۆەرسيادانى جوعارى باعالادى
ستۋدەنتتەر سپورتىنىڭ حالىقارالىق فەدەراتسياسى ۇيىمداستىرۋ كوميتەتتەرىنە مەكتەپ وقۋشىلارى جانە ستۋدەنتتەرىنىڭ حالىقارالىق سايىستارىن وتكىزگەندە الماتىنىڭ تاجىريبەسىن ەسكەرۋدى ۇسىندى.
2017-جىلعى 19- تامىزدا تايبەي قالاسىندا حالىقارالىق جازعى ۋنيۆەرسيادا ويىندارى وتەدى. ايتۋلى سپورت دوداسىندا قازاقستاندىق 121 سپورتشى جەڭىل اتلەتيكا، ءجۇزۋ، بوكس، كۇرەس جانە باسقا دا سپورت تۇرلەرىنەن ەل نامىسىن قورعايتىن بولادى.
ۋنيۆەرسيادا الاۋى جانباي تۇرىپ، ستۋدەنتتەر سپورتىنىڭ حالىقارالىق فەدەراتسياسىنىڭ اتقارۋشى كوميتەتى Grand Hyatt قوناق ۇيىندە جيىن وتكىزدى. جيىن بارىسىندا ساراپشىلار كەڭەسى الماتىدا وتكەن ۋنيۆەرسيادا ويىندارىن قورىتىندىلادى.
ماماندار الماتىداعى سايىستىڭ ۇيىمداستىرۋ دەڭگەيى مەن ساپاسىنا باعا بەردى. 170 ەل وكىلىنىڭ الدىندا ساراپشىلار كەڭەسىنىڭ جەتەكشىسى ميلان اۆگۋستين بايانداما وقىدى. ونىڭ ايتۋىنشا، بۇعان دەيىن ەشقانداي ۋنيۆەرسيادا ويىندارى الماتىداعىداي قىزىعۋشىلىق تۋعىزعان جوق. سپورتتىق شارا وتكىزىلەر الدىندا بارلىق بيلەتتەر ساتىلىپ كەتكەن. ۋنيۆەرسيادا الاۋىنىڭ ەستافەتاسى دا ەرەكشە فورماتتا ءوتتى. ساراپشىلار الماتى بيلىگى سياقتى مەكتەپ وقۋشىلارى مەن ستۋدەنتتەرگە دەمالىس جاريالاۋعا ۇسىنىم بەردى. ءوز بايانداماسىن قورىتىندىلاي كەلە ميلان اۆگۋستين الماتىداعى ۋنيۆەرسيادانى ۇزدىك دەپ تانىدى.
«الماتىدا وتكەن ويىنداردىڭ تاجىريبەسى وتە ماڭىزدى. بولاشاقتا ۋنيۆەرسيادا ويىندارىن وتكىزۋ كەزىندە ءبىز قازاقستانمەن ارىپتەستىكتى نىعايتا تۇسەمىز»، - دەدى FISU پرەزيدەنتى ولەگ ماتىتسين.
2017-جىلى الماتىدا وتكەن 28- قىسقى ۋنيۆەرسيادا ويىندارىنىڭ ديرەكتورى نايل نۋروۆ ماتيتسىن ولەگكە ويىنداردىڭ اياقتالعانى تۋرالى ەستەلىك سەرتيفيكات تابىستادى.
اۆتور: گۇلميرا عوسمانالي