قانات يسلام: قازىر استانادا جابىق جاتتىعۋلار وتكىزىپ جاتىرمىز

استانا. قازاقپارات - ەكسپو حالىقارالىق كورمەسى اياسىندا ۇيىمداستىرىلاتىن بوكس كەشىندە جۇدىرىقتاساتىن قانات يسلام مەن وزگە دە ءبىرقاتار بوكسشىلار قازىر استانادا جابىق جاتتىعۋلار وتكىزىپ جاتىر.

بۇل تۋرالى ول قازاقپارات تىلشىسىنە بەرگەن سۇحباتىندا ءمالىم ەتتى.

«قازىر استاناداعى «استانا ارەنا» ستاديونىندا جابىق جاتتىعۋ جاساپ جاتىرمىز. جانىمدا 9 قىركۇيەك كۇنى مەنىمەن بىرگە ەل اتىنان شارشى الاڭعا شىعاتىن ءبىرقاتار بوكسشى بار. جاتتىعۋىمىز ويداعىداي وتۋدە. سپارينگ قارسىلاستارىمىز دا جەتكىلىكتى. باپكەرلەرىمىزدىڭ نۇسقاۋى بويىنشا بارلىق جوسپارىمىز بىرتىندەپ ىسكە اسۋدا»، - دەپ اتاپ ءوتتى قانات يسلام.

سونداي-اق ول اشىق جاتتىعۋىن قاشان وتكىزەتىنىن ايتىپ بەردى.

«ءبىزدىڭ جاتتىعىپ جاتقان زالىمىزعا كەلىپ، بوكس كەشىنە دايىندىعىمىزدى تاماشالاعىسى كەلەتىن جانكۇيەرلەرىمىز وتە كوپ. ولاردىڭ بارلىعى زالدا جۇرسە جاتتىعۋعا كەرى اسەرىن تيگىزەتىن ساتتەر بولادى. سوندىقتان ماڭىزدى ايقاسقا دايىندالىپ جاتقاندىقتان جابىق ەسىك اياسىندا جاتتىعۋدى ءجون سانادىق. جانكۇيەرلەرىمىز تۇسىنىستىكپەن قارايدى دەگەن سەنىمدەمىز. اشىق جاتتىعۋ جاسايتىن كۇندەرىمىز دە الىس ەمەس. بۇيىرسا تامىزدىڭ ەكىنشى جارتىسىندا جانكۇيەرلەر اشىق جاتتىعۋىمىزدى تاماشالاي الاتىن بولادى»، - دەدى يسلام.

ەسكە سالايىق، 9- قىركۇيەك كۇنى استاناداعى «سارىارقا» ۆەلوترەگىندە بوكس كەشى ءوتىپ، وندا قانات يسلام (24-0,19 ك و) كانادالىق برەندون كۋكپەن (18-0, 11 ك و) جۇدىرىقتاسادى. بوكسشىلار ءبىرىنشى ورتا سالماقتاعى IBF تيتۋلىنا ۇمىتكەرلىككە تالاسادى.

وسى جەكپە-جەكتىڭ اندەركارتىندا قازاقستاندىق 8 بوكسشى ونەر كورسەتەدى. ولار - جانقوش تۇراروۆ (21-0, 15 ك و)، جانىبەك ءالىمحان ۇلى (1-0, 1 ك و)، مەيىرىم نۇرسۇلتانوۆ (3-0,2 ك و)، رۋسلان مىرساتايەۆ (3-0, 3 ك و)، ءالي احمەدوۆ (7-0,5 ك و)، ايدوس ەربوسىن ۇلى (6-0, 6 ك و)، ديماش نيازوۆ (11-0-3, 5 ك و) جانە نۇرسۇلتان جاڭابايەۆ.

اۆتور: كۇنسۇلتان وتارباي