شەبەر ەركىنبەك بوكەبايەۆتىڭ قولىنان شىققان بۇل ءۇشىنشى تۋىندى. ول وسىعان دەيىن جەمىس- جيدەك پەن كوكونىس ساتۋعا ارنالعان جىلجىمالى دۇڭگىرشەك جاساعان. ال مىنا كيىز ءۇي پىشىندەس زاماناۋي تىركەمەگە وسى وڭىرگە ساپارى كەزىندە ەلباسى نۇرسۇلتان نازاربايەۆ تا قىزىعۋشىلىق تانىتقان. ەركىنبەك تاجەن ۇلى مۇنى جاساۋعا 6 اي ۋاقىت جۇمساعانىن ايتادى. كەيبىر بولشەكتەرىن شەتەلدەن تاپسىرىسپەن الدىرعان، دەپ حابارلايدى 24 ارنا.
ۇلتتىق ونەر مەن زاماناۋي زاتتاردى ۇشتاستىرعان قولونەر شەبەرى: «اربانى يننوۆاتسيالىق ساۋدا نۇكتەسى رەتىندە پايدالانۋعا بولادى»، - دەيدى. كيىز ءۇي ىشىندەگى جارىق كۇن نۇرىنان قۋات الادى. ەرەكشە جوبا تاياۋدا EXPO كورمەسىنە كەلۋشىلەردىڭ نازارىنا ۇسىنىلۋى مۇمكىن.
«ءبىرىنشى رەت ءبىز كيىز ءۇيدى مەحانيزمىن پايدالانىپ، كورسەتىپ وتىرمىز. اربا بولعاننان كەيىن ونىڭ دوڭگەلەگى بار. كيىز ءۇي بولعاننان سوڭ، ونىڭ فورماسى بار. ال ول كەزدەردەگى اربالاردىڭ ۇستىندەگى كيىز ۇيلەردە شاڭىراق بولدى دەپ ايتا المايمىز. ۇلتتىق ناقىشتارىمىزدى ساقتاي وتىرىپ، 21-عاسىردىڭ جەتىستىكتەرىن پايدالانا وتىرىپ، سانيتارلى- گيگيەنالىق جاعىنان ءارى ارحيتەكتۋرالىق، ديزايندىق تالاپقا ساي ەتىپ وسىنى جاسادىق»، - دەيدى ونەرتاپقىش ەركىنبەك بوكەبايەۆ.