اقتوبەدەگى رەترو اندەر فەستيۆالىندە جەرگىلىكتى بيلىك پەن پوليتسيا كەلىسىمگە كەلە المادى - فوتو
ەركە مەن تورەعاليدىڭ كونتسەرتىنەن سوڭ پوليتسيا قىزمەتكەرلەرى مەن ۇيىمداستىرۋشىلار ءبىر مامىلەگە كەلە المادى، دەپ حابارلايدى قازاقپارات ءتىلشىسى.
اقتوبەدە رەترو اندەر فەستيۆالى ءوتىپ جاتىر. بىرەر اپتا بويى دايىندىق جۇرگىزگەن عازيزا جۇبانوۆا اتىنداعى اقتوبە وبلىستىق فيلارمونياسىنىڭ ۇجىمى بۇل ءان كەشىن كورەرمەنمەن تىعىز بايلانىستا وتكىزۋدى جوسپارلاعان ەكەن. كورەرمەن ءان تىڭدايدى، ءتىپتى ورتاداعى الاڭعا شىعىپ، بيلەي الادى. ءبىراق ەركە مەن تورەعاليدىڭ كونسەرتىندەگى جايسىز وقيعادان سوڭ جەرگىلىكتى پوليتسيا قىزمەتى ءتارتىپتى كۇشەيتىپ، ەكى قاتاردان تۇراتىن قورشاۋمەن ساحنانى بەكىتىپ تاستادى.
«رەترو اندەر فەستيۆالىنە جاسى ۇلكەن ادامدار كەلەدى دەپ 800 ورىندىق قويىلدى. ەسكى، ەستى اندەردى تىڭداپ، بىرگە شىرقايىق دەگەن ماقساتپەن ۇيىمداستىرىلعان كەش ەدى. ەل ءانۇرانىنىڭ اۆتورى، كومپوزيتور ءشامشى قالداياقوۆتىڭ تۋعان كۇنىنە تۇسپا- تۇس ۇيىمداستىرىپ، اقتوبەلىكتەرگە تاماشا كوڭىل- كۇي سىيلاعىمىز كەلدى. استانا فيلارمونياسىنان ءۇش ءانشى، الماتىدان ميراس- قۇرالاي بەكجانوۆتار، جادىرا ارىستانوۆا، ايگۇل ەلشىبايەۆا كەلدى. ءبارى شاقىرۋدى قابىلداپ، بىردەن كەلىسىم بەردى. جەرگىلىكتى «تامسان» توبى، ەر- ءجۇنىس توبى بار. رەپەرتۋار ارنايى تاڭدالىپ، سەناري جازىلدى. وسىنداي كەشتە قويىلعان قورشاۋ كەدەرگى كەلتىرىپ تۇر»، - دەدى اقتوبە وبلىستىق فيلارمونيا ديرەكتورى ەلۋباي كەنجاليەۆ.
رەترو اندەر فەستيۆالىنە ءشامشى قالداياقوۆتى كورگەن اعا بۋىن وكىلدەرى دە كەلدى.
«ءوزىم الماتىدا وقىپ، ءشامشى قالداياقوۆتى كورگەن اداممىن. ستۋدەنت كەزىمىزدە ولار ءبىزدىڭ جانىمىزدان تابىلاتىن. كەشتەرگە قاتىستى، ونىڭ اڭگىمەلەرىن ەستىدىم. رەترو اندەر فەستيۆالى بولعان سوڭ جاس كەزىمىزدى ەسكە ءتۇسىرۋ ءۇشىن كەلدىك»، - دەدى اقتوبەلىك تۇرعىن بايۇزاق ماحمۋتوۆ.
ايتا كەتەيىك، ساحنا الدىنداعى ەكى قاتارلى قورشاۋدى الىپ تاستاۋ تۋرالى كەلىسىم اقتوبە وبلىسى اكىمىنىڭ ورىنباسارى ەربول نۇرعاليەۆ پەن وبلىستىق جەرگىلىكتى پوليتسيا قىزمەتىنىڭ باستىعى قانىبەك جاقسىعاليەۆتىڭ اراسىندا ءجۇردى. ارادا 1 ساعات وتكەندە ەكى قورشاۋ دا الىنىپ، كەيىن پوليتسيا قىزمەتكەرلەرى بيلىكپەن اراداعى كەلىسىمگە ءشۇبا كەلتىرىپ، ساربازداردى ساحنا الدىنا كۇزەتكە قويدى. ەسكە سالساق، قۇرىلىسشىلار كۇنى ەركە مەن ءتوراعالي اقتوبەدەگى ساياباقتا ءان ايتىپ، كورەرمەن ساحناعا شىعىپ كەتكەن بولاتىن.