موڭعوليانىڭ مادەنيەت ءمينيسترى تۇركى اكادەمياسىنىڭ جۇمىسىنا قولداۋ كورسەتۋگە ءازىر - فوتو
ەكىجاقتى كەزدەسۋدە اكادەميا باسشىسى ۇيىمنىڭ جۇزەگە اسىرىلىپ جاتقان جوبالارى جونىندە اڭگىمەلەپ، كەلەشەكتەگى جوسپارلارىمەن ءبولىستى. سونىمەن بىرگە، اكادەميانىڭ ۇيىمداستىرۋمەن موڭعوليادا باستالعان «كەنتايدان ۇلىتاۋعا دەيىن: تاريحي جادىنىڭ جاڭعىرۋى» اتتى Ⅲحالىقارالىق ەكسپەديتسيانىڭ ماقساتىمەن تانىستىرىپ، ونىڭ باعىتى جونىندە مالىمەت بەردى.
ءوز كەزەگىندە مينيستر گ. چۋلۋۋنبااتار حالىقارالىق تۇركى اكادەمياسىنىڭ جۇمىسىمەن ەتەنە تانىس ەكەنىن ايتىپ، جوعارى باعا بەردى.
اكادەميا مەن موڭعوليا اراسىندا قالىپتاسقان قارىم- قاتىناستى نىعايتۋعا، سونداي-اق كەلەشەكتە بىرلەسكەن جوبالار جۇرگىزىپ، موڭعول ەلىندە جوسپارلانعان عىلىمي باستامالارعا ءوز تاراپىنان مەيلىنشە قولداۋ كورسەتۋگە ءازىر ەكەندىگىن جەتكىزدى. سونىمەن بىرگە حالىقارالىق ەكسپەديتسيا جۇمىسىنا ساتتىلىك تىلەدى.
كەزدەسۋ سوڭىندا د. قىدىرالى مينيسترگە كورسەتكەن قۇرمەتى مەن ىقىلاسى ءۇشىن العىس ءبىلدىرىپ، اكادەميا باسىپ شىعارعان قۇندى عىلىمي ەڭبەكتەردى تارتۋ ەتتى.
ايتا كەتۋ كەرەك، TWESCO موڭعوليانىڭ بەلدى عىلىمي- زەرتتەۋ ۇيىمدارىمەن مەموراندۋمعا قول قويىپ، تىعىز بايلانىس ورناتقان. اتاپ ايتقاندا، موڭعوليا ۇلتتىق عىلىم اكادەمياسىمەن، موڭعوليا ۇلتتىق مۋزەيىمەن، سونداي- اق موڭعوليا ۇعا جانىنداعى تاريح، ارحەولوگيا ينستيتۋتىمەن بەكىتىلگەن ءوزارا ىنتىماقتاستىق قۇجاتتارى نەگىزىندە بۇگىندە بىرنەشە جوبا ءساتتى جۇزەگە اسىرىلىپ وتىر.