قانات يسلام: كورىنگەننىڭ سىنىنا قۇلاق اساتىن ۋاقىتىم جوق
كاسىپقوي بوكستاعى قازاق سپورتشىسى، WBA FedeCaribe تۇجىرىمىنىڭ چەمپيونى قانات يسلام 9- قىركۇيەك كۇنى ءوزىنىڭ 25- جەكپە-جەگىن وتكىزەدى. قارسىلاسى - 31 جاستاعى كانادالىق بوكسشى برەندون كۋك.
وسى ۋاقىتقا دەيىن كاسىپقوي بوكستا جەڭىلىپ كورمەسە دە، كۋكتىڭ الەمدىك دەڭگەيدە سالماقتى تيتۋلى جوق. دەگەنمەن، قانات يسلام «كۋك مىقتى بوكسشى ەمەس» دەگەن پىكىرلەردى ەلەمەي، كەز كەلگەن جەكپە-جەككە تياناقتى دايىندالۋ كەرەك دەيدى. استاناداعى جاتتىعۋىنان سوڭ informburo.kz تىلشىسىمەن اڭگىمەلەسكەن «قازاق» (قانات يسلامنىڭ لاقاپ اتى - اۆت.) جاتتىقتىرۋشىسىن اۋىستىرا ما، جوق پا، قازىرگى دايىندىعى قانداي دەڭگەيدە، اۋرۋ بالالار مەن جەتىمدەرگە نە ءۇشىن كومەكتەسەتىنى تۋرالى كەڭىنەن اڭگىمەلەپ بەردى.
- ءسىزدىڭ كەلەسى جەكپە-جەگىڭىزگە دەيىن تۋرا ءبىر اي ۋاقىت قالىپتى. دايىندىعىڭىز قالاي؟
- اللاعا شۇكىر، دايىندىعىمىز وتە جاقسى. جاتتىقتىرۋشىم امەريكادان كەلدى. ءبىر اي بويى الماتىدا ۇلتتىق قۇرامامەن بىرگە تاۋدا دەنە شىنىقتىردىق. ماعان وسى جاتتىعۋدىڭ پايداسى كوپ ءتيدى. استاناداعى جاتتىعۋدى باستاعانىما ءبىر اپتا. قارسىلاس- سپاررينگ بوكسشىلار دا كەلىپ ۇلگەردى. قازىر ەكى سپاررينگ وتتىك. بارلىعى ويداعىداي، جاتتىقتىرۋشىمنىڭ دا كوڭىلىنەن شىعىپ جاتىرمىن. قازىرگى ماڭىزدى ماسەلە - جاراقات الماي، وسى ءبىر ايدى جوسپار بويىنشا وتكىزۋ.
- جارىس الدىنداعى وسى ءبىر اي ۋاقىت جالپى تەز وتە مە، الدە تاعاتتى تاۋىسا، جارىس كۇنىن كۇتتىرە مە؟
- بۇل سپورتتاعى ەڭ قيىن كۇندەر. جارىس ءبىر-اق كۇندە وتە شىعادى، ال سوعان دەيىنگى ۋاقىت ەڭبەكتى، شىدامدىلىقتى تالاپ ەتەدى. «ءوز-ءوزىڭدى جەڭ» دەپ وسىندايدا ايتىلسا كەرەك.
- قانات، وسى جەكپە-جەگىڭىزدىڭ استانادا وتەتىنى ءسىز ءۇشىن ۇتىمدى ما؟ الدە، «ءوز وتانىمدا، ءوز حالقىمنىڭ الدىندا جەڭىلىپ قالماسام ەكەن» دەگەن ۋايىم بار ما؟
- جەكپە-جەكتىڭ ۇيدە، ءوز ەلىمدە ءوتىپ جاتقانىنا مەن قاتتى قۋانىشتىمىن. ويتكەنى، جەكپە-جەكتەردىڭ بارلىعى امەريكادا نەمەسە گەرمانيادا وتەدى. ال، وسىنداي الەمدىك بوكس كەشىن نەگە ءوز ەلىمىزدە وتكىزبەسكە؟ بۇل - جەكپە-جەك قازاقستاننىڭ كاسىپقوي بوكستاعى ۇلكەن قادامى.
- كۋكپەن جەكپە-جەككە شىعاتىنىڭىز بەلگىلى بولعان سوڭ، سپورت «سىنشىلارى»، جانكۇيەرلەردىڭ ءبىرازى: «قانات جاڭادان بوكستاسىپ جۇرگەن بالا ەمەس، تاجىريبەسى بار. ودان سالماقتى جەكپە-جەك كۇتكەن ەدىك. كۋك كاسىپقوي بوكستا جەڭىلىپ كورمەسە دە، ەشقاشان مىقتى بوكسشىلارمەن جۇدىرىقتاسقان ەمەس، تيىسىنشە، قىزىعاتىن تيتۋلى دا جوق. جاسى بولسا 31 دە» دەپ شۋ ەتە قالدى. بۇعان نە دەيسىز؟
- سىن تۇزەلمەي، ءمىن تۇزەلمەيدى دەگەن بار. مەنىڭ جانكۇيەرلەرىم دە مەنى مىقتى بولسىن، جاقسى بولسىن دەپ ايتادى. مەنى دە الەمدەگى ەڭ مىقتى بوكسشىلارمەن كەزدەسسىن دەيدى. وسىعان دەيىن بوكستاسقان 24 قارسىلاسىمنىڭ ءبارى دە مەن ءۇشىن ءبىر-ءبىر باسپالداق. وسىنداي باسپالداقتىڭ بارىنەن ءوتۋ كەرەك. بىردەن بارىپ چەمپيوندىققا تالاسۋعا بولمايدى. مىسالى، مەن دە بىردەن الەمدەگى ەڭ مىقتى بوكسشىمەن كەزدەسكىم كەلەدى. ءبىراق، ونىڭ الدىنداعى باسپالداقتاردان وتپەي، وعان جەتە المايسىڭ. سوندىقتان، وسىنداي سىن ايتىپ جاتقان ادامداردىڭ بارىنە راقمەت ايتامىن. قانداي قارسىلاس بولسىن مەن بوكستاسۋعا دايىنمىن.
- برەندون كۋكقا قاتىستى سپورتقا قىزىعاتىن قازاقستاندىقتاردى ەزۋ تارتتىرعان تاعى ءبىر-ەكى فاكت بار. بىرىنشىدەن، برەندون كۋك 2017-جىلدىڭ اقپانىندا باسىنا كورەرمەندەر لاقتىرعان مۇز تولى شەلەك ءتيىپ، نوكاۋتقا كەتكەن بوكسشى. ەكىنشىدەن، سوڭعى 10 جىل ىشىندە ول بوكستاعى مانسابىنان تىس ۋاقىتتا، تەرەزە مەن ەسىك ورناتىپ، جۇمىس ىستەگەن. ءسىز ءۇشىن وسىنداي دەڭگەيدەگى بوكسشىمەن رينگكە شىعۋ ۇيات ەمەس پە؟
- ءاربىر بوكسشىنىڭ بوكستان باسقا قىزعۋشىلىقتارى بار، ءارتۇرلى جۇمىستارى بار. ءتىپتى، تۇنگى كلۋبتا جۇمىس ىستەيتىندەرى دە كەزدەسەدى. ءبىراق، بۇل بوكسشى سونىمەن جان باعىپ ءجۇر دەگەن ءسوز ەمەس. مەن دە مىسالى بوكستان تىس ۋاقىتىمدا اۋىلعا بارىپ، اتقا ءمىنىپ، جىلقى باعامىن. سوندىقتان، مەنى كۋكتىڭ بوكستان باسقا ءومىرى، جۇمىسى قىزىقتىرمايدى، مەن ونى سپورتشى رەتىندە، قارسىلاسىم رەتىندە قابىلدايمىن.
- سوندا اۋىلعا بارىپ، جىلقى باعاتىن ۋاقىت قايدان تاباسىز؟ اۋىل ادامدارى سۋرەتكە تۇسەيىك دەپ مازالاماي ما؟
- اۋىلدا ەشكىم مازامدى المايدى، كەرىسىنشە، قالادا سولاي (كۇلەدى). اۋىلدا قاراپايىم قازاق رەتىندە، ءوزىمنىڭ حوببيىم رەتىندە اتقا مىنەمىن. ال اۋىل ادامدارى ءۇشىن مەنىڭ بارعانىم، كەلگەنىم، اتقا مىنگەنىم تاڭسىق ەمەس، ويتكەنى ۇيرەنگەن.
- حالىق ءسىزدىڭ پروموۋتەرىڭىز نەلسون لوپەستى «السىز قارسىلاس تاڭدايدى» دەپ سىناسا دا، ول تاڭداعان قارسىلاستاردىڭ ءبىرازىن ءسىز ءبارىبىر تەز جەڭە العان جوقسىز. بۇل كەزدەيسوقتىق پا الدە ءسىز ءۇشىن جەكپە-جەكتى 12 راۋندقا دەيىن جەتكىزۋ ماڭىزدى ما؟
- نەگىزى، سپورتتا ءالسىز قارسىلاس، مىقتى قارسىلاس دەگەن بولمايدى. سپورتتا ءبىر سوققىمەن عانا جەڭە سالادى. بوكستى كەشە ۇيرەندىڭ بە، الدە مىقتى بوكسشىسىڭ با، رينگكە مىڭ ەسە ساقتىقپەن شىعۋ كەرەك. قارسىلاسىڭ دا الاڭعا بەكەر شىقپاعانىن، قانشاما تەر توگىپ دايىندالعانىن ەستەن شىعارماۋ كەرەك. سوندىقتان، سپورتتان سىرت ادامنىڭ بىرەۋدى ءالسىز، بىرەۋدى مىقتى دەپ سىناۋى تەرىس دەپ ويلايمىن.
جالپى، ءوزىم كوپ ادامنىڭ سىنىنا قۇلاق اسا بەرمەيمىن. ارينە، تىڭدايمىن، قابىلدايمىن، ءبىراق «ول ادام ماعان سىن ايتاتىنداي كىم؟» دەپ ويلايمىن. ماعان اقىلىن، سىن-اقىلىن ايتاتىن ۇستازدارىم بار، بوكستىڭ مىقتىلارى بار، سولاردىڭ عانا ءسوزىن تىڭدايمىن. بوكستى ەڭ العاش باستاعاندا، مەنى ەشكىم تانىعان جوق، ال، بوكستا ءسال تانىلىپ ەدىم، مەنى ءبارى بىلە باستادى. ەڭ باستىسى، جۇمىس ىستەلىپ جاتىر. كەيبىر ادامداردىڭ 10 جىلدا ىستەيتىن جۇمىستارىن ءبىز 5 جىلدا ىستەدىك. سوندىقتان، بىرەۋدىڭ سىنىنا قۇلاق اسىپ، كىدىرەتىن ۋاقىتىم جوق.
- ءسىز نەگە ءدال وسى نەلسون لوپەسپەن جۇمىس ىستەيمىن دەپ شەشتىڭىز؟ بۇل ادام شىنىمەن دە ءسىزدى مىقتى ەتتى مە؟
- ءبىز نەلسونمەن بىرگە «استانا ارلاندارىنان» بەرى بىرگە جۇمىس ىستەپ كەلە جاتىرمىز. بۇنىڭ قول استىندا رەسەيدىڭ ءبىراز سپورتشىلارى دايىندالدى. سول كەزدەن باستاپ تانىسقان بولاتىنبىز. بۇل كىسىمەن بىرگە كاسىپقوي بوكستىڭ قىر-سىرىن ۇيرەندىك. باسقا دا مىقتى پروموۋتەرلەرمەن كەلىسىمشارتتارى بار. ياعني، مەنى قىزعانىپ وتىرعان جوق، قايتا، باسقالار ارقىلى تانىتىپ جاتىر. ال، بۇنى بىلمەيتىندەر، بارلىعىن سىناپ-مىنەي بەرەدى. جالپى، قازاقستاندا كاسىپقوي بوكستى جاقسى بىلەتىندەر از دەر ەدىم. مىقتى پروموۋتەر بولىپ، ون چەمپيون دايىنداپ، ماعان سىن ايتسا، تىڭدار ەدىم. ال بىزدە ونداي ادام جوق. ءبىراق، اقىل ايتقىش ادامدار كوپ. بۇل دۇرىس ەمەس. ويتكەنى، ءوزىڭ ىستەمەگەن دۇنيەنى باسقادان تالاپ ەتۋگە بولمايدى.
- ءسىزدىڭ دەمەۋشىڭىز كاسىپكەر باۋىرجان وسپانوۆ ەكەنىن ءبارىمىز بىلەمىز. جالپى، بۇل كىسىمەن قالاي تانىستىڭىزدار؟ جانە دە دەمەۋشى بولعان سوڭ، «مىنا جەكپە-جەكتى نوكاۋتپەن اياقتا، كەلەسى جەكپە-جەكتى سوڭىنا دەيىن جەتكىز» دەپ تالاپ قويا ما؟
- باۋىرجان وسپانوۆپەن اعا-ءىنى رەتىندە سىيلاسامىز. مەنى قازاقستانعا ەڭ العاش رەت اكەلىپ، كاسىپقوي بوكسقا جول اشقان، وسىعان دەيىنگى 24 كەزدەسۋدىڭ بارىنە دەمەۋشى بولعان سول كىسى. باۋىرجان اعام قازاق جىگىتتەرى بۇكىل الەمگە قازاقتىڭ اتىن شىعارسا ەكەن، الدىنان جول اشىلسا ەكەن دەپ قانا ارماندايدى. ماعان عانا ەمەس، قانشاما ادامعا، تۋعان اۋىلىنا، تۋعان جەرىنە كوپ كومەكتەسكەن ادام. ماقساتى - قازاق جاستارى مىقتى بولسا ەكەن دەيدى. سپورتتا دا، ومىردە دە ماعان ەشقانداي تالاپ قويمايدى.
- قىستا باتىس قازاقستان وبلىسىنداعى قالالاردىڭ بىرىنە بارعاندا، جەتىم بالالارمەن كەزدەستىڭىز. سول كەزدە جەتىمدەر ۇيىنەن بالا اسىراپ الاتىن نيەتىم بار دەگەن ەدىڭىز. بۇدان باسقا ءسىز اۋرۋ بالالارعا قول ۇشىن سوزىپ، كومەكتەسىپ تۇراتىنىڭىزدى بىلەمىز. ويتكەنى، ونىڭ ءبارىن youtobe جەلىسىنە سالىپ وتىراسىز. بۇل PR ما الدە قالاي؟
- كەيبىر دۇنيەلەردى جاريا ىستەۋگە بولادى. ساداقانى وڭ قولىڭ بەرسە، سول قولىڭ بىلمەسىن دەگەن بار. جەتىم بالالارعا، اۋرۋ بالالارعا كومەكتەسۋ ءبىزدىڭ ازاماتتىق بورىشىمىز دەپ بىلەمىن. ونى ۆيدەوعا تۇسىرسەك، بىزدەن كورىپ بىرەۋ جاقسىلىق جاساسىن دەگەن نيەت قانا. ول جەردە مەن جۇلدىز بولىپ جارقىرايمىن دەگەن وي جوق. مەنىڭ چەمپيون بولعانىمنىڭ، ون بەلبەۋىمنىڭ حالىققا نە كەرەگى بار؟ حالىق بىزدەن ۇلكەن ءۇمىت كۇتەدى. ياعني، ميلليونداپ اقشا تاۋىپ، ون ەمەس، ءجۇز بەلبەۋ الساڭ دا، جەتىم باۋىرلارىڭا كومەكتەسە الماساڭ، نە كەرەگى بار؟.
- قازىر جاسىڭىز 32 دە. ەندى نەشە جىل بوكستاساسىز؟
- ونى ءبىر اللا بىلەدى. كەيبىر بوكسشىلار 50 جاسىنا دەيىن سپورتتان كەتپەيدى. ال مەنىڭ سپورتتاعى جاسىمنىڭ نەشە جىلدان كەيىن اياقتالاتىنىن ءبىر اللا عانا بىلەدى.
- برەندون كۋك بيىلعى سوڭعى قارسىلاسىڭىز با؟ الدە جىل سوڭىنا دەيىن جوسپارلانعان جەكپە-جەكتەر بار ما؟
- جوق، سوڭعى جەكپە-جەك ەمەس. جىل سوڭىنا دەيىن تاعى ءبىر جەكپە-جەك وتكىزەمىز دەگەن جوسپار بار. ول جەكپە-جەكتىڭ قاشان، قايدا جانە كىممەن وتەتىنىن سول ۋاقىتىندا بىلە جاتارسىزدار.
- اڭگىمەڭىزگە راقمەت! استاناداعى بوكس كەشىندە جەڭىس تىلەيمىز!