تۇركى الەمىنىڭ جاس قالامگەرلەرى ىستانبۇلدا باس قوستى

استانا. قازاقپارات - بۇگىن ىستانبۇل قالاسىندا تۇركيا رەسپۋبليكاسىنىڭ مادەنيەت جانە تۋريزم مينيسترلىگى مەن ەۋرازيا جازۋشىلار وداعىنىڭ ۇيىمداستىرۋىمەن تۇركى الەمى جاس اقىن-جازۋشىلارىنىڭ ءبىرىنشى فەستيۆالى باستالدى، دەپ حابارلايدى قازاقپارات تۇركى اكادەمياسى حالىقارالىق ۇيىمىنىڭ رەسمي پورتالىنا سىلتەمە جاساپ.

العاش ۇيىمداستىرىلعان شاراعا ازەربايجان، قازاقستان، قىرعىزستان، وزبەكستان، سولتۇستىك كيپر تۇرىك رەسپۋبليكاسى، تۇركيا مەن تۇرىكمەنستاننان جانە باسقا 22 تۇركى ايماعىنان كەلگەن 58 جاس ادەبيەتشى قاتىسۋدا.

ءوز ەلدەرىندە كىتاپتارى شىققان نەمەسە ادەبي ورتادا ءبىرشاما تانىلعان جاس قالامگەرلەر تۇركى الەمى ادەبيەتىندەگى زاماناۋي ۇردىستەر مەن تاقىرىپ، جانر الۋاندىلىعى جايلى پىكىر الىسىپ، ءوزارا تاجىريبە الماسپاق.

بۇدان بولەك، ۇيىمداستىرۋشىلاردىڭ ايتۋىنشا، كەلەشەك تۇركى ادەبيەتىن قالىپتاستىرۋشى جاستار ەلدەرىنە ورالعان سوڭ ءبىر-بىرلەرىنىڭ شىعارمالارىن ءوز تىلدەرىنە اۋدارادى دەپ كۇتىلۋدە.

سونىمەن بىرگە ءالي اكباش (تۇركيا)، انار (ازەربايجان)، تولەن ابدىك (قازاقستان) پەن يسمايل بوزكۋرت (سولتۇستىك كيپر تۇرىك رەسپۋبليكاسى) سىندى قالامى قارىمدى تانىمال اقىن-جازۋشىلار جاس ادەبيەتشىلەرگە ءدارىس وقىپ، ومىرلىك تاجىريبەلەرىمەن بولىسەدى دەپ جوسپارلانعان.

باعدارلاماسى ءتۇرلى ادەبي جانە مادەني شارالاردى قامتيتىن فەستيۆال 4 كۇنگە جالعاسىپ، 18-تامىزدا قورىتىندىلانادى.