راسىندا دا بۇكىل الەمگە تانىلدى، تەك جامان اتتى بولدى.
دينەش پەن تاراكەشۆاري 2016 -جىلى ەۆەرەست شىڭىنا «شىققان» سۋرەتتەرىن جاريالاپ، جەردىڭ ەڭ بيىك نۇكتەسىن (8850 مەتر) باعىندىرعان العاشقى ءۇندىستاندىق جۇپ ەكەندەرىن مالىمدەگەن ەدى. الايدا جۇبايلاردىڭ سۋرەتتەردى قولدان جاساپ شىققاندارى انىقتالدى. اقىرىندا ءۇندىستاننىڭ ماحاراشترا شتاتىندا پوليتسيا بولىمشەسىنىڭ باسشىسى ەكى بىردەي قىزمەتكەرىن جۇمىستان قۋدى.
«ءبىز ايەلىم ەكەۋمىز ەۆەرەستكە شىقپايىنشا بالالى بولمايمىز دەپ شەشتىك. ەندى ماقتانىشپەن اتا-انا بولا الامىز»، - دەگەن بولاتىن دينەش 2016 -جىلى كاتماندۋدا وتكەن كونفەرەنسيا بارىسىندا.
ءوز جەتىستىكتەرىن دالەلدەۋ ماقساتىندا جۇبايلار ەۆەرەستتە تۇسكەن سۋرەتتەرىن كورسەتكەن ەدى. بۇل رەتتە نەپالدىڭ تۋريستىك دەپارتامەنتى جۇبايلارعا شىڭدى باعىندىرعانى جونىندەگى رەسمي سەرتيفيكات تابىستاعان. ال ب ا ق قۇرالدارى بۇل وقيعانى «جالپى ۇلتتىق جەڭىسكە» بالاپ، جارىسا جازعان ەدى.
الايدا ارادا ءبىر اي وتكەننەن كەيىن بانگالور تۇرعىنى، الپينيست ساتيارۋپ سيدحانتحا ەلگە تاراعان سۋرەتتەردىڭ وزىنە تيەسىلى ەكەنىن مالىمدەدى.
«ولار مەنىڭ سۋرەتىمدى الىپ، فوتوشوپ ارقىلى ءوز بەتتەرىن قويىپ العان. ول ازداي، سەرتيفيكات الىپتى... بۇل زامان قايدا بارادى»، - دەپ جازعان بولاتىن سيدحانتحا الەۋمەتتىك جەلىدە.
اتالعان جازبادان كەيىن ماماندار تەكسەرىس جاساپ، الپينيستەردىڭ شىڭعا شىققانى مەن لاگەرگە كەلۋ ۋاقىتىنىڭ اراسى تىم جاقىن ەكەنىن اڭعاردى.
تاعى ءبىر الپينيست سۋرەندرا سەلكە دينەشا پەن تاراكەشۆاريدىڭ كيىمىنەن وزگەشەلىك بايقاعان.
«بيىككە شىقپاس بۇرىن دينەشانىڭ ۇستىندە قىزىل-قارا ءتۇستى، ال ەۆەرەستتە تۇرعان ساتتە سارعىلت ءتۇستى كيىم تۇر. شىڭعا شىعۋ بارىسىندا كيىم اۋىستىرۋ مۇمكىن ەمەس. سۋرەتتەردىڭ لاگەردەگى ستۋديادا جاسالعانىنا 0 سەنىمدىمىن»، - دەپ مالىمدەدى ول.
اقىرىندا جاساندى سۋرەتتەر سوتتا قارالدى. ارينە، سۋرەتتى قولدان جاساعانى ءۇشىن ەشكىم تۇرمەگە وتىرمايدى. الايدا جۇپقا ەل اۋماعىندا الپينيزممەن 10 جىل بويى اينالىسۋعا تىيىم سالىندى. بۇدان وزگە، پوليتسەي بولىپ جۇمىس ىستەگەن جۇبايلار قىزمەتتەن قۋىلدى.