قاراعاندىدا ءىرى قارجى پيراميداسىنىڭ باسشىسى سوتتالدى
وكتيابر اۋداندىق سوتى امانتاي ابدىكامالوۆ ەلەنا كولەسنيكوۆانى ق ك 217-بابى 3-بولىگىندە كوزدەلگەن قىلمىستى جاساعانى ءۇشىن ايىپتى دەپ تانىدى.
«سوتتالۋشىعا ورتاشا قاۋىپسىزدىك رەجىمىمەن تۇزەۋ كولونياسىندا 4 جىل جانە 5 ايعا باس بوستاندىعىنان ايىرۋ تۇرىندە جازا تاعايىندالسىن»، - دەگەن ۇكىمدى وقىدى سۋديا امانتاي ابدىكامالوۆ.
جابىرلەنۋشى سالىمشىلاردىڭ پايداسىنا سوت 385 ميلليون تەڭگە ءوندىرىپ بەرۋدى قاۋلى ەتتى، سونداي-اق زاڭسىز جولمەن العان مۇلىك مەملەكەت پايداسىنا تاركىلەۋگە جاتادى. پروكۋرور سارجان سابىر ونى 10 جىل باس بوستاندىعىنان ايىرۋدى سۇراعان بولاتىن.
جابىرلەنۋشى 752 ادام بولىپ تانىلدى. الايدا كەيبىر جابىرلەنۋشىلەر كولەسنيكوۆانىڭ جۇمىسىنداعى ۋاقىتشا قيىندىقتار عانا اقشانى قايتارۋعا كەدەرگى كەلتىردى دەپ سانايدى.
ولار فيرما داعدارىستى جاعدايدان شىققاننان كەيىن ولار سالعان اقشادان پروتسەنت تۇرىندە تابىس اكەلەتىنىنە سەنىمدى. بۇل رەتتە جابىرلەنۋشىلەر پروتسەنتى تۋرالى ايتپاعاندا، ءتىپتى نەگىزگى سومانى دا الماعان. كولەسنيكوۆا سالىمشىلاردىڭ مىندەتتەمەلەرىن ورىنداماعان بولىگىندەگى ايىبىن عانا مويىندادى.
ول ونىڭ الاياقتىق جاسايتىن نيەتى بولماعانىن، ازاماتتارعا اقشانى قايتارۋعا جەكە سالىمشىلاردىڭ شاعىمدارى مەن تەرگەۋ ورگاندارىنىڭ ارالاسۋى كەدەرگى كەلتىرگەنىن ايتتى. ءىس ماتەريالدارىندا فيرما جەكە تۇلعالاردان 3 ميلليارد تەڭگە العانى، ونىڭ ىشىندە سالىمشىلارعا 2 ميلليارد تەڭگەسى قايتارىلماعانى جازىلعان.
ءبىر جارىم مىڭنان استام سالىمشىلار مەن كۋاگەرلەردەن جاۋاپ الىندى، ەكى مىڭنان استام تەرگەۋ ارەكەتتەرى جۇرگىزىلدى، ونىڭ ىشىندە ساراپتاما جانە وزگە دە زەرتتەۋلەر بار، الدىندا كۇدىكتى بولعان بەس ادام كۋاگەر اتاندى. ولارعا قاتىستى ءىس تەرگەۋگە بەلسەندى جاردەمدەسكەنى ءۇشىن جانە وكىنۋگە بايلانىستى توقتاتىلدى. سونىمەن قاتار، بەلگىسىز تۇلعالارعا قاتىستى جەكە وندىرىسكە بولىنگەن تاعى ءبىر قىلمىستىق ءىس بار. قىلمىستىق جاۋاپكەرشىلىككە تارتۋ ءۇشىن ولاردىڭ كىم ەكەنىن انىقتاۋ جۇمىستارى جۇرگىزىلۋدە.