جاس فۋتبولشىلار حالىقارالىق تۋرنيردە چەمپيون اتاندى

شىمكەنت. قازاقپارات - وڭتۇستىك قازاقستان وبلىستىق فۋتبول مەكتەبىنىڭ تاربيەلەنۋشىلەرى وڭتۇستىك كورەيادا وتكەن حالىقارالىق تۋرنيردە چەمپيون اتاندى.

مۇنداي جەڭىس تۇستىكتىڭ ءار جىلدارداعى بالعىن سپورتشىلارىنا 25 جىلدان كەيىن ەندى بۇيىرىپ وتىر، دەپ حابارلايدى قازاقپارات ح ا ا ءتىلشىسى.

شىمكەنتتەگى «لوكوماتيۆ» ستاديونىندا فۋتبول مەكتەبىنىڭ ۇجىمى كورەيادان ورالعان جاستارعا قۇرمەت كورسەتتى.

وسىدان ءبىر اپتا بۇرىن جالاۋى كوتەرىلگەن ازيا ليگاسىنداعى حالىقارالىق تۋرنيردە كۇنگەيلىك سپورتشىلاردىڭ توپ جارۋى وڭاي بولعان جوق. ويتكەنى، مۇندا الەمنىڭ ەڭ مىقتى دەگەن 24 كومانداسى باق سىنادى. فۋتبولشىلار 8 ويىن وتكىزىپ، ونىڭ التاۋىندا جەڭىسكە جەتتى. بۇل - وڭتۇستىك قازاقستاندىق اياق دوپ شەبەرلەرىنىڭ شىعىس ازياعا جاساعان العاشقى ساپارى بولاتىن.

جاس فۋتبولشىلار جارتىلاي فينالدا كورەيالىق «بايول نايۆەن» كومانداسىمەن ويناپ، 2:0 ەسەبىمەن ۇتتى. بۇل جەتىستىك ولاردىڭ فينالعا شىعۋىنا مۇمكىندىك بەردى. اقتىق ويىندا كورەيالىق چەمپيوندارمەن كەزدەسىپ، 1:0 ەسەبىمەن جەڭىسكە جەتكەن.

وڭتۇستىك كورەيانىڭ ۋلدجين قالاسىندا وتكەن تۋرنيردە 12 جاسار سانجار ەرگەش «كورەيانىڭ ۇزدىك قورعاۋشىسى» اتاندى. سپورت مەكتەبىنىڭ تۇلەكتەرى بۇل جارىستان بولەك، باسقا دودالاردا دا ۇزدىكتەر قاتارىنان كورىندى.

دەنە شىنىقتىرۋ جانە سپورت باسقارمالارى اراسىندا وتكەن قازاقستان چەمپيوناتىندا 12 كوماندانىڭ ىشىنەن باس جۇلدەنى جەڭىپ العان بولاتىن. سونداي-اق، فۋتبول فەدەراتسياسىنىڭ ۇيىمداستىرۋىمەن قوستاناي قالاسىندا وتكەن قازاقستان بىرىنشىلىگىندە ءبىرىنشى ورىن تۇعىرىنان كورىنگەن ەدى.