الماتىدا كۋۆەيت اقىنى قازاق تىلىندە سويلەدى
كۋۆەيتتىك اقىننىڭ «كۋۆەيت شۇعىلاسى» اتتى كىتابىن اراب جانە قازاق تىلدەرىندە، سونداي-اق، «كۋۆەيت اقىنى - ابدۋل ازيز ساۋد ءال-بابتين پوەزياسى جانە ونىڭ ەرەكشەلىگى» اتتى عىلىمي ەڭبەكتى تانىستىرۋعا ارنالعان ادەبي كەشكە بۇگىن كۋۆەيتتەن ءال-بابتين اتىنداعى ورتالىق كىتاپحانانىڭ وكىلى ساۋد ابدۋللا ءال اتيقي، قازاقستاننىڭ كۋۆەيت ەلىندەگى ەلشىسى الماس ابدرامانوۆ جانە ءال-فارابي اتىنداعى قاز ۇ ۋ- ءدىڭ شىعىس تانۋ فاكۋلتەتىنىڭ دەكانى پالتورە ىحتيار قاتىستى.
«ساۋد ءال-بابتيننىڭ ەكى جيناعىن قازاق تىلىنە اۋدارىپ وتىرمىز. ماقساتىمىز - اراب ءتىلىن جەتىك بىلەتىن، اسىرەسە، اراب پوەزياسىن قازاق تىلىنە اۋدارا الاتىن مامانداردىڭ بار ەكەنىن كورسەتۋ. مۇنداعى ويىمىز قازاق اقىن-جازۋشىلارى شىعارمالارىن اراب تىلدەرىنە اۋدارۋدى قولعا الۋ»، - دەيدى پالتورە ىحتيار.
سونداي-اق، بۇگىن كۋۆەيتتەگى ءال-بابتين اتىنداعى ورتالىق كىتاپحانا مەن ق ر ۇلتتىق كىتاپحاناسى اراسىندا ءوزارا ىنتىماقتاستىق تۋرالى مەماراندۋمعا قول قويىلدى. جيىندا ەلباسى نۇرسۇلتان نازاربايەۆتىڭ «رۋحاني جاڭعىرۋ: بولاشاققا باعدار» ماقالاسىنداعى مىندەتتەر ءسوز بولدى. اتالعان ماقالاداعى مىڭ جىلدىق تاريحىمىزدا ءتول مادەنيەتىمىز تۇڭعىش رەت الەمنىڭ بارلىق قۇرلىقتارىنا جول تارتىپ، باستى تىلدەرىندە سويلەيتىنى ايتىلعان.
وسى ورايدا قازاقستاننىڭ كۋۆەيتتەگى ەلشىسى اراب الەمى تاراپىنان قازاق ادەبيەتىنە دەگەن قىزىعۋشىلىق بار ەكەنىن ايتتى.
«ق ر ۇلتتىق كىتاپحاناسىنىڭ ديرەكتورى جانات سەيدۋمانوۆ ەكى رەت كۋۆەيتكە كەلىپ، ءبىرقاتار كەلىسسوزدەر جۇرگىزدى. كۋۆەيت تاراپى قازاق ادەبيەتىن اۋدارۋعا قىزىعۋشىلىق تانىتىپ وتىر. ءبىز ءوز تاراپىمىزدان اعىلشىن تىلىنە اۋدارىلعان ادەبيەتتىرىمىزدى كۋۆەيت كىتاپحانالارىنا بەردىك. ءبىز قازاق ادەبيەتىن اۋدارۋعا دايىندالىپ جاتىرمىز، كۋۆەيتتىكتەر قارجىلاندىرۋعا ءازىر»، - دەدى قازاقستاننىڭ كۋۆەيتتەگى ەلشىسى الماس ءابدىرامانوۆ.
ايتا كەتەيىك، قازاق وقىرمانىنا تانىستىرىلىپ وتىرعان كۋۆەيت اقىنى ءال-بابتين 1936-جىلى دۇنيەگە كەلگەن. ول 2009-جىلى قازاقستانعا ءىس-ساپارمەن كەلگەن. ول اراب پوەزياسى مەن اراب ادەبي مۇرالارىن جيناقتاۋشى بەلگىلى قوعام قايراتكەرى.