قىركۇيەكتەن باستاپ گرۋزيا قازاقستانعا قارىزىن وتەيدى
بۇل تۋرالى قازاقستان رەسپۋبليكاسىنىڭ گرۋزياداعى توتەنشە جانە وكىلەتتى ەلشىسى ەرمۇحامەت ەرتىسبايەۆ ءمالىم ەتتى، دەپ حابارلايدى قازاقپارات.
«قىركۇيەكتىڭ باسىندا گرۋزيا قازاقستانعا مەملەكەتتىك قارىزىن تولەۋدى باستايدى. 90-جىلداردىڭ ورتا كەزىندە، ياعني 20 جىل بۇرىن 27,5 ميلليون دوللار قارىزعا بەرگەن ەدىك. ول كەزدە وزىمىزدە قارجى تاپشىلىعى ورىن العان، جاعداي بولاتىن»، - دەدى ول ق ر سىرتقى ىستەر مينيسترلىگىندە وتكەن باسپا ءسوز ءماسليحاتىندا.
ونىڭ سوزىنە قاراعاندا، گرۋزيا قارىزدى تومەن پايىزدىق مولشەرمەن تولەيتىن بولادى. بۇل تۇرعىدا پاريجدىك كلۋب كەستەسى نازارعا الىنادى، ياعني اتالعان كلۋب دامۋشى ەدەردىڭ بورىشىن قايتا قۇرىلىمداۋمەن اينالىساتىن بەيرەسمي ۇكىمەتارالىق ۇيىم بولىپ تابىلادى.
«2013-جىلدىڭ كوكتەمىندە اتالعان ەلگە بارعان بويدا، قارىزدى قايتارتقىزۋ ماسەلەسىن توتەسىنەن قويدىم. وسى رەتتە كەلىسسوزدەر ءجۇردى. ەندى قارىزدى تومەن پايىزبەن پاريجدىك كلۋب كەستەسى بويىنشا تولەيدى»، - دەدى ە. ەرتىسبايەۆ.