«مەن كۇيەۋىمە توقال ىزدەپ ءجۇرمىن. 21 - 27 جاس ارالىعىنداعى، قازاقى تاربيە العان، اتا-ەنەنى سىيلاي بىلەتىن، استى ءدامدى پىسىرەتىن، مىنەزى سابىرلى، سالماقتى قىز كەرەك. كۇيەۋىمدى بيىلدان قالدىرماي ۇيلەندىرۋىمىز كەرەك»، - دەيدى جاننا.
جاننا بۇنداي شەشىمىنىڭ سەبەبىن دە اشىپ ايتتى.
«ەربول ەكەۋمىزدىڭ ۇيلەنگەنىمىزگە سەگىز جىل بولدى. اللاعا شۇكىر، باقىتتىمىز. ءبىر-بىرىمىزگە دەگەن سىي-قۇرمەتىمىزدى بىلەسىڭ، كورىپ تە ءجۇرسىڭ. ءبىراق مەن وعان بالا تۋىپ بەرە المايمىن. سەبەبى دەنساۋلىعىم جارامايدى، بىرنەشە رەت وپەراتسيادا بولعانمىن. جاتىر تۇتىكشەلەرىن الىپ تاستاعان. ال ەربولدىڭ جاسى 30 عا تاياپ قالدى. ونىڭ دا ۇرپاق ءسۇيىپ، بالالى بولۋعا قۇقى بار. ءوزى بۇل جايلى اۋىز اشىپ، ءلام دەپ كورگەن ەمەس. دەگەنمەن ۋاقىت وتكەن سايىن مەن قينالىپ بارا جاتىرمىن. ويتكەنى قاتارلارىنىڭ الدى سۇندەت توي جاساپ، قۋانىشتارىن اتاپ ءوتىپ جاتىر، ەربول دا ۇرپاق ءسۇيىپ، بالاسىنىڭ ماڭدايىنان يىسكەپ، ءتاتتى قىلىعىنا ءسۇيسىنىپ وتىرسا جاراسپاي ما دەگەن وي مەنىڭ جانىمدى جەپ بارا جاتىر.
بىزدە ءبارى بار. باسپانا دا، كولىك تە، شاعىن بيزنەس تە. تەك بالا جوق. جاساندى ۇرىقتاندىرۋ جولىمەن بولسا دا بوسانىپ الار ەدىم، وعان جاسىم ءوتىپ كەتكەن. دەنساۋلىعىم دا جارامايدى»، - دەگەن ايەل كۇيەۋىننىڭ ەكىنشى ايەل، بالا جايلى ءسوز قوزعامايتىن ايتاتادى.
«ول ۇندەمەگەن سايىن مەنىڭ جانىم اۋىرىپ بارادى. اقىرى شىداي الماي، ءبىر كۇنى وعان: «اناڭ بولسا قارتايدى. وعان كۇتىم جاساپ، كيىمىن جۋىپ، ءدامدى اسىن ازىرلەيتىن كەلىن كەرەك. ءوزىڭنىڭ بالا ءسۇيىپ، تاربيەلەيتىن، اكە بولاتىن ۋاقىتىڭ كەلدى. مەنىڭ ساعان ەش رەنىشىم جوق. كوڭىلىڭدەگى، ويىڭداعى ادامىڭ بولسا، جولىڭ اشىق. مەن كەدەرگى بولمايمىن»، - دەپ اشىق ايتتىم دەيدى كەيىپكەر.
كەيىن ەربول جارىنا «وزىڭە سىرلاس دوس ءارى ءسىڭلى، اناما كەلىن، ماعان جار، ال بالاما انا بولار ادامدى ءوزىڭ تاپ»، - دەپ كەسىپ ايتقان.
«ءبىز وسى ءباتۋاعا توقتالدىق. قۇدا ءتۇسىپ، قالىڭمالىن تولەپ، سىرعا سالىپ الىپ كەتەمىز. بەتاشارىن دا جاسايمىز. تۇرمىسىمىزدى بىلەسىڭ، تارشىلىق كورمەيدى. استىندا كولىك، باسىندا بار جاعدايى جاسالعان باسپانا بولادى. انامىزدى سىيلاپ، اسىن بەرىپ وتىرسا، ەربولدى ەرىم دەپ قۇرمەتتەپ، الدىنان كەسىپ وتپەسە ەكەن دەيمىز. تۇسىنىگى بار قىز بولسا ءتىل تابىسىپ كەتەمىز دەپ سەنەمىن. ول دا ازاماتىنىڭ بايبىشەسى بارىن مويىنداۋى ءتيىس. بار قوياتىن تالابىمىز وسى. بالا تاربيەسىنە ءوزىم كومەكتەسەمىن، بەسىگىن تەربەتىپ، وزىنە سىرلاس اپكە بولۋعا ءازىرمىن»، - دەيدى جاننا.
وسىلاي دەگەن جاننا كۇيەۋىنە جار بولار لايىقتى ادام تابىلسا، بەتاشاردى كوپكە ۇزاتپاي، قازان ايىنىڭ ورتاسىنا دەيىن وتكىزگىسى كەلەتىنىن دە ەسكەرتتى.