تەڭگە باعامىنىڭ كوتەرىلۋىن ساراپشىلار كوڭىل- كۇيگە تەڭەدى
ايتا كەتۋ كەرەك، 2-3 -تامىزدا اقشا ايىرباستاۋ پۋنكتتەرىندەگى دوللار باعامى 335,72 تەڭگەگە دەيىن كوتەرىلىپ كەتكەن بولاتىن.
«بىرىنشىدەن، سىرتقى فاكتورلار ىقپال ەتتى. اتاپ ايتقاندا، كورشىلەس رەسەي ەلىنە الەمدىك قاۋىمداستىق تاراپىنان سالىنىپ جاتقان سانكسيالاردىڭ اسەرى كوپ بولدى. كورشىمىز سانكسيا بولاتىنىن ءبىلىپ الدىن الا قامدانعان بولۋ كەرەك. ويتكەنى، رۋبل باعامى (59-60) وزگەرە قويعان جوق. «كەيبىر» اقپارات قۇرالدارىنىڭ ارقاسىندا ءبىزدىڭ نارىققا دا قاۋەسەت اسەر ەتتى. سونىڭ سالادرىنان نارىقتا ىشكى فاكتور قالىپتاستى. اتاپ ايتقاندا، دوللارعا دەگەن سۇرانىس كوبەيىپ كەتتى. ادەتتە كۇنىنە 150-350 ميلليون تەڭگەدەن اسپايتىن اينالىم، 2-3 كۇندەرى 500 ميلليون تەڭگەدەن اسىپ كەتتى»، - دەدى «قازاقستان قور بيرجاسى» ا ق باسقارما ءتوراعاسىنىڭ ورىنباسارى اندرەي ساليۋك.
الماتىدا 2-3 -تامىز كۇندەرى اقشا ايىرباستاۋ پۋنكتتەرىندە وتە بەلسەندى جۇمىس بولدى.
«اقشا ايىرباستاۋ پۋنتتەرى مەن ەكىنشى دەڭگەيلى بانكتەر بىزدەن اقپاراتتى شىققان مەزەتىندە الادى. كۋرس ايىرماسىن ولار شەتىندەگى ترەندتەن كورەدى. وسى جولى ساتىپ الۋ مەن ساتۋ اراسىنداعى ايىرما (سپرەد) 1,5-3 تەڭگە كولەمىندە قالدى. نارىقتا بەلگىسىزدىك ورىن العان كەزدە سپرەد 6-عا دەيىن كوتەرىلەدى. بانكتەر مەن ايىرباستاۋ پۋنكتتەرى ونى شىعىنعا باتپاۋ ءۇشىن ىستەيدى. تامىزداعى جاعداي بويىنشا سپرەد بيرجادا ساۋدالانعان ۆاليۋتا باعامىنىڭ كولەمىندە بولدى. سوندىقتان، بۇل ۋاقىتشا قۇبىلىس ەكەنى اۋەل باستان بەلگىلى بولدى»، - دەدى اندرەي ساليۋك.
قازىرگى تاڭدا بيرجا ماماندارىنىڭ ايتۋىنشا، نارىقتا جاعداي تۇراقتاندى. بۇعان مۇناي باعاسىنىڭ قىمباتتاۋى ىقپال ەتتى.
قازىر دوللاردىڭ تەڭگەگە شاققانداعى باعامى 331,9-332,9 بولىپ تۇر.