استانا اۋەجايىنىڭ ماڭدايشا جازۋى «نۇرسۇلتان نازاربايەۆ حالىقارالىق اۋەجايى» دەپ وزگەردى
اگەنتتىك تىلشىسىنە اۋەجايدان حابارلاعانىنداي، جازبا ۇشۋ-قونۋ جولاعى جاق بەتىنە ورناتىلعان. سونىمەن قاتار ءدال وسىنداي جازبا تەرمينالعا كىرەر بەتىندە دە ورناتىلاتىن بولادى.
ايتا كەتەرلىگى، جازبا قازاق جانە اعىلشىن تىلدەرىندە جازىلادى. ەستەرىڭىزگە سالا كەتسەك، استانانىڭ حالىقارالىق اۋەجايىنىڭ اتاۋى وسىدان ءبىراز ۋاقىت بۇرىن «نۇرسۇلتان نازاربايەۆ حالىقارالىق اۋەجايى» بولىپ وزگەرگەن ەدى.
قازاقستان ۇكىمەتىنىڭ سايكەس قاۋلىسى 2017 -جىلدىڭ 21 -ماۋسىم كۇنىندە جالپىۇلتتىق «ەگەمەن قازاقستان» جانە «كازاحستانسكايا پراۆدا» گازەتتەرىندە جاريالاندى. ءسال كەيىنىرەك ەلباسى «روسسيا 24» تەلەارناسىنىڭ تىلشىسىنە بەرگەن سۇحباتىندا پرەزيدەنتتىڭ قۇرمەتىنە استانا اۋەجايىنىڭ اتاۋىن وزگەرتۋ باستاماسىنا قاتىستى پىكىر ءبىلدىردى.
«بۇل مەنىڭ باستامام ەمەس. مەن ىلعي دا بۇنداي باستامالارعا قارسى بولىپ كەلدىم. ءبىراق بۇنداي ۇسىنىس قايتا-قايتا الدىمنان شىعا بەرەدى. سوعان قاراعاندا، ادامدار اتقارىلعان جۇمىستى كورىپ، سوعان ريزاشىلىعى مەن العىسىن بىلدىرگىسى كەلەتىن سەكىلدى، - دەدى پرەزيدەنت نۇرسۇلتان نازاربايەۆ.
«كەز كەلگەن ساياساتكەر، مەملەكەت باسشىسى تاريحتا اتقارعان ىسىمەن قالۋى كەرەك. باعا بەرەتىن ءبىزدىڭ بۋىن ەمەس، كەلەر ۇرپاق. مەن ۇلى فيلوسوف، ريم يمپەراتورى مارك اۆرەلييدىڭ «ءسىزدىڭ نەگە ءالى كۇنگە ەسكەرتكىشىڭىز جوق؟» دەگەن سۇراققا: «مەن كەيىن ادامدار مىنا ەسكەرتكىش كىمنىڭ ەسكەرتكىشى دەپ سۇراعانىن قالامايمىن. كەرىسىنشە، «مىنا ادامعا نەگە ءالى ەسكەرتكىش قويىلماعان؟» - دەپ سۇراعانىن قالايمىن»، - دەگەن جاۋابىن ءجيى ەسىمە الامىن».
ىرگەتاسى سوناۋ 1937 -جىلى قالانعان قازاقستان استاناسىنىڭ اۋەجايى 86 جىلدىڭ ىشىندە ەڭ شاعىن ۇشاقتاردان باستاپ، كەز كەلگەن اۋا رايىنا قاراماستان اۋە كەمەسىنىڭ كەز كەلگەن تۇرىنە قىزمەت كورسەتە الاتىن الىپ نىسانعا اينالدى.
اۆتور: مارلان جيەمباي