وسى ايتىلعان بەس امال بارلىعىمىزدىڭ قولىمىزدان كەلەدى، ءبىراق سولاردى جاساماي ءجۇرمىز. شىندىعىندا، سولاردى ىستەۋ ءبىز ءۇشىن تۇككە تۇرمايدى. ءبىر پاقىر اۋىلىنداعى كيەلى كىسىگە كەلىپ: «مەن نەگە كەدەيمىن؟ »- دەپ سۇرادى. عۇلاما كىسى وعان قاراپ: - سەبەبى سەن اقجۇرەك، كەڭپەيىل ەمەسسىڭ، - دەپ جاۋاپ بەردى. كەدەي ونداي جومارت بولۋىم ءۇشىن وتە باي بولۋىم كەرەك دەگەن ويمەن:
- مەن ونداي اتىمتاي جومارت بولۋىم ءۇشىن قولىمدا كوپ دۇنيە بولۋى كەرەك ەمەس پە، ال مەنىڭ قولىمدا باسقالارعا ۇلەستىرىپ تاراتاتىن ەشتەڭە جوق، - دەدى.
كيەلى كىسى: - ءوزىڭ ايتقانداي جومارت بولۋ ءۇشىن سەنىڭ قولىڭدا بەس ءتۇرلى نارسە بار، ءبىراق سەن سول مارتتىكتى پايدالانباي ءجۇرسىڭ، - دەدى. كەدەي بايعۇستىڭ كوزى باقىرايىپ: - ايتىڭىزشى، ول قانداي بەس نارسە؟ - دەپ سۇرادى.
اۋليە: - سەن ءوزىڭنىڭ نۇرلى جۇزىڭمەن، وڭ قاس- قاباعىڭمەن قورشاعان جۇرتقا ادەمى كۇلكى سىيلاي الار ەدىڭ، ءبىراق سونى ىستەمەي ءجۇرسىڭ. ادەمى كوزدەرىڭمەن باسقا ادامدارعا سۇيىسپەنشىلىك پەن قامقورلىقتى كورسەتەر ەدىڭ، ءبىراق ونى دا جاساماي ءجۇرسىڭ. جاراتۋشىمىزدىڭ ساعان بەرگەن ادەمى اۋزىمەن باسقالار ءۇشىن قۇندى اڭگىمەلەر ايتا الار ەدىڭ، ءبىراق ونى دا ىستەمەي ءجۇرسىڭ. سەن ءوز جۇرەگىڭمەن باسقالارعا باقىت تىلەي الار ەدىڭ، ونى امال قىلىپ جۇرگەن جوقسىڭ. جالپى العاندا سەن ءوز تانىڭمەن باسقا ادامدارعا كوپ جاقسىلىق جاساي الار ەدىڭ، ءبىراق ونى دا ىستەمەي ءجۇرسىڭ، - دەگەن ەكەن.
Massaget.kz