كۇتىلگەندەي، ايدىڭ جارتىلاي تۇتىلۋى تامىزدىڭ 7 سىنەن 8 ىنە قاراعان ءتۇنى بولدى.
«ءتۇن باتقان كەزدە اي تولىق كورىنەدى، ءبىراق بىرتە- بىرتە ونىڭ كوپ بولىگى كورىنبەي قالادى. تۇتىلۋدىڭ تولىق فازاسىندا ايدىڭ تومەنگى بولىگىنىڭ شامامەن تورتتەن ءبىر بولىگى كەسىلگەندەي بولادى»، - دەپ اتاپ وتكەن بولاتىن م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ (س ق م ۋ) استروفيزيكا كافەدراسىنىڭ دوتسەنتى اندرەي سولودوۆنيك.
عالىمنىڭ ايتۋىنشا، قازاقستاندىقتار ايدىڭ تۇتىلۋ ءساتىن سوڭعى رەت التى جىل بۇرىن كورگەن بولاتىن.
«قازاقپارات» اگەنتتىگىنىڭ الماتىداعى فوتو ءتىلشىسى الەكساندر پاۆسكي دە بۇل ەرەكشە قۇبىلىستى وبەكتيۆىنە ءتۇسىرىپ الدى.
جەردىڭ سەرىگىن كوكشەتاۋدا شوۋمەن دياس نۇرماعامبەتوۆ ۆيدەوعا ءتۇسىرىپ الىپ، ينستاگرامدا ءبولىستى. «بۇگىن اي تۇتىلىپ جاتىر. 12 ەسە ۇلكەيتىپ كورسەتەتىن لينزاسى بار ايفونعا ءتۇسىردىم»، - دەپ جازدى ول.
استانادا تۇراتىن بلوگەر ەرلان ساكەنوۆ ايدىڭ تۇتىلۋىن فوتوعا ءتۇسىرىپ، فەيسبۋكتەگى پاراقشاسىنا ورنالاستىردى. «اي تۇتىلىپ جاتقان ساتتە ونى فوتوعا ءتۇسىرىپ الۋدى شەشتىم. مۇنى ۇناتامىن»، - دەيدى ول.