فيدجي پرەمەر-ءمينيسترى قازاقستانعا كەلەدى

استانا. قازاقپارات - كەلەسى اپتادا فيدجي پرەمەر-ءمينيسترى دجوساي ۆورەكە باينيماراما قازاقستانعا ساپارمەن كەلەدى.

بۇل تۋرالى بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆا سەنىم گراموتاسىن تابىستاعان فيدجي رەسپۋبليكاسىنىڭ ەلشىسى يوانە نايۆالۋرۋان ءمالىم ەتتى، دەپ حابارلايدى قازاقپارات.

«ەكسپو-2017» كورمەسىن كورىپ تاڭ-تاماشا بولدىق. كەلەسى اپتادا مەنىڭ پرەمەر-ءمينيسترىم استانادا بولادى. ول سىزدەردىڭ ەلدەرىڭىزدىڭ شاقىرۋىن قابىل الدى. ءبىزدىڭ ەلىمىز وسىنداي ەكىجاقتى قارىم-قاتىناستىڭ ارقاسىندا ديلوماتيالىق بايلانىستارىمىزدى جاقسارتا الامىز دەپ ەسەپتەيدى»، - دەدى ول كەزدەسۋدەن كەيىن ب ا ق وكىلدەرىنە.

ايتا كەتەيىك، قازاقستان مەن فيدجي ديپلوماتيالىق قارىم-قاتىناس ورناتۋ تۋرالى كەلىسىمگە 2012-جىلدىڭ 6-ماۋسىمىندا قول قويعان بولاتىن.

«ديپلوماتيالىق قارىم-قاتىناسىمىزدىڭ تاريحي تەرەڭدە ەمەس. ءبىز تاۋەلسىزدىگىمىزدى 1970-جىلى الدىق. سوندىقتان جاس ءارى شاعىن ەل سانالامىز. سىزدەرمەن ىنتىماقتاستىقتىڭ ۇلكەن مۇمكىنشىلىكتەرىن كورىپ وتىرمىز. ماسەلەن، تۋريزم، ءبىلىم، اۋىل شارۋاشىلىعى، سونىمەن بىرگە بالىق شارۋاشىلىعىنداعى ىنتىماقتاستىققا مۇمكىندىك بار. سپورت باعىتىنداعى ىنتىماقتاستىق مۇمكىنشىلىكتەرىن قاراستىرۋدامىز. سىزدەردىڭ كۇرەس، بوكستان جانە سپورتتىڭ باسقا دا سالالارىنان جاقسى ناتيجە كورسەتەتىندەرىڭىزدى بىلەمىن»، - دەدى ەلشى.

فيدجي ەلشىسىمەن اڭگىمەلەسۋ بارىسىندا گ. ءابدىقالىقوۆا تۋريزم سالاسى ىنتىماقتاستىقتىڭ كەلەشەگى زور باعىتتارىنىڭ ءبىرى بولىپ تابىلاتىندىعىنا نازار اۋدارعان بولاتىن.

ونىڭ اتاپ وتۋىنشە، ەكى ەلدىڭ تۋريستىك ۆەدومستۆولارى مەن كومپانيالارى اراسىنداعى تىكەلەي بايلانىستاردى ورناتۋ اتالعان سالاداعى ارىپتەستىكتى دامىتۋعا سەرپىن بەرەدى.