گۇلشارا ءابدىقالىقوۆا شەتەل ەلشىلەرىنەن سەنىم گراموتاسىن قابىلدادى
اتاپ ايتقاندا مەملەكەتتىك حاتشىعا ۋرۋگۆاي شىعىس رەسپۋبليكاسىنان ەنريكە حۋان دەلگادو حەنتا، كولۋمبيا رەسپۋبليكاسىنان الفونسو لوپەس كابالەرو، ەريتەريا مەملەكەتىنەن پەتروس تسەگگاي، فيدجي رەسپۋبليكاسىنان يوانە نايۆالۋرۋان، لاوس حالىق دەموكراتيالىق رەسپۋبليكاسىنان سيۆيەنگفەتا فەتۆوراساك، چيلي رەسپۋبليكاسىنان رودريگو حوسە نەتو ماتۋرانا، گۆاتەمالا رەسپۋبليكاسىنان گيسالا اتاليدا گودينەس ساسو سەنىم گراموتاسىن تابىس ەتتى، دەپ حابارلايدى قازاقپارات.
گۇلشارا ءابدىقالىقوۆا ۋرۋگۆاي ەلشىسىمەن كەزدەسۋ بارىسىندا قازاقستان ءۇشىن ۋرۋگۆاي لاتىن امەريكاسىنداعى بارىنشا پەرسپەكتيۆالى سەرىكتەستىكتىڭ ءبىرى بولىپ تابىلاتىندىعىن اتاپ ءوتتى جانە ب ۇ ۇ قاۋىپسىزدىك كەڭەسىنىڭ 2017-2018-جىلدارداعى تۇراقتى ەمەس مۇشەسىن سايلاۋ كەزىندە قازاقستاننىڭ كانديداتۋراسىنا قولداۋ كورسەتكەنى ءۇشىن ريزاشىلىق ءبىلدىردى.
«ەكىجاقتى ءوزارا ارەكەتتەستىكتىڭ قوزعاۋشى كۇشى ساۋدا-ەكونوميكالىق ىنتىماقتاستىق بولۋى قاجەت دەپ ەسەپتەيمىن. وسىعان وراي تاۋار اينالىمى مەن ءوزارا ينۆەستيتسيالاردى ارتىرۋعا نازار اۋدارا وتىرىپ، ىسكەرلىك بايلانىستارىمىزدى جانداندىرۋىمىز كەرەك»، - دەدى گۇلشارا ءابدىقالىقوۆا كولۋمبيا ەلشىسىمەن كەزدەسۋى بارىسىندا.
مەملەكەتتىك حاتشى ەريتەريا ەلشىسىمەن كەزدەسۋدە قازاقستان ب ۇ ۇ ق ك- ءنىڭ تۇراقتى ەمەس مۇشەسى رەتىندە وزىنە سومالي مەن ەريتەريا بويىنشا سانكسيا كوميتەتىنىڭ ءتوراعاسى مىندەتتەمەسىن الىپ، شىعىس افريكا وڭىرلەرى جانە جالپى قۇرلىقتاعى بەيبىتشىلىككە، تۇراقتىلىققا ءارى قاۋىپسىزدىككە جاردەمدەسۋگە ۇمتىلاتىندىعىن باسا ايتتى.
ال فيدجي ەلشىسىمەن اڭگىمەلەسۋ بارىسىندا ءابدىقالىقوۆا تۋريزم سالاسى ىنتىماقتاستىقتىڭ كەلەشەگى زور باعىتتارىنىڭ ءبىرى بولىپ تابىلاتىندىعىنا نازار اۋداردى. ەكى ەلدىڭ تۋريستىك ۆەدومستۆولارى مەن كومپانيالارى اراسىنداعى تىكەلەي بايلانىستاردى ورناتۋ اتالعان سالاداعى ارىپتەستىكتى دامىتۋعا سەرپىن بەرەدى.
لاوس ەلشىسىمەن كەزدەسۋ كەزىندە مەملەكەتتىك حاتشى وڭتۇستىك- شىعىس ازيا ەلدەرىمەن ەكونوميكالىق ىنتىماقتاستىقتى جانداندىرۋ قر سىرتقى ساياساتىنىڭ ماڭىزدى تۇستارىنىڭ ءبىرى ەكەندىگىن ايتتى. قازاقستان وڭتۇستىك-شىعىس ازيا مەملەكەتتەرى قاۋىمداستىعى قىزمەتىنىڭ مەحانيزمدەرى مەن تاجىريبەسىن قولدانۋعا مۇددەلى.
«چيلي رەسپۋبليكاسىنىڭ ۇكىمەتىنە قر ەكونوميكالىق ىنتىماقتاستىق جانە دامۋ ۇيىمىنا مۇشە بولۋ ماسەلەلەرىندە قولداۋ كورسەتكەنى ءۇشىن ريزاشىلىق بىلدىرەمىز»، - دەدى گۇلشارا ءابدىقالىقوۆا چيلي ەلشىسىمەن كەزدەسۋىندە. سونىمەن قاتار مەملەكەتتىك حاتشى گۆاتەمالا ەلشىسىمەن اڭگىمەلەسۋ بارىسىندا ەكى ەلدىڭ اراسىندا ينفراقۇرىلىم، قارجى، قىزمەت كورسەتۋ، كولىك، اۋىل شارۋاشىلىعى، جەڭىل جانە تاماق ونەركاسىبى جوبالاردى بىرلەسە جۇزەگە اسىرۋعا بولاتىندىعىن ايتتى.