بەكبولات تىلەۋحان الەمدىك مەرگەن باتكەريل ميچير قازاقتارعا نە ءۇشىن تاڭدانعانىن ايتتى
«اتقارىپ جاتقان شارالاردىڭ اياسىندا وشكەنىمىزدى جاڭعىرتىپ، ولگەنىمىزدى ءتىرىلتۋ ماقساتى جاتىر. بىزدە ءبىراز دۇنيەنىڭ اتى بولعانىمەن، زاتى جوعالىپ كەتكەن. اتاپ ايتقاندا، ات ۇستىنەن ساداق تارتۋ جايىندا تۇرعىندار بىلگەنىمەن، ونىمەن اينالىسىپ جۇرگەندەر جوقتىڭ قاسى. باسقا ەلدەردە ساقتالعانىمەن، قازاقتا ساقتالماعانى وتە وكىنىشتى. سوندىقتان ءبىراز ماماندارمەن اقىلداسا كەلە، وسى باعىتتى قالپىنا كەلتىرۋدىڭ جان-جاقتى مۇمكىندىكتەرىن قاراستىردىق. سودان، 2014 -جىلى ات ۇستىنەن ساداق اتاتىن تانىمال موڭعول ازاماتى باتكەريل ميچيردى شاقىرتتىق. سول ازامات بىزگە وق جونۋدى ۇيرەتىپ، ات ۇستىنەن ساداق تارتۋ تۇرعىسىندا كومەكتەستى. جالپى، سول كەزدە ات ۇستىندە ساداق ۇستاماعان جىگىتتەر اينالاسى ەكى اپتانىڭ ىشىندە الەمدىك دەڭگەيدە ساداقپەن اتىپ جۇرگەن ب. ميچيردىڭ كورسەتكىشىنە جەتتى. وسىنى كورگەن موڭعول باپكەرىمىز تاڭدانعاننان، كوزىن جۇمىپ، اۋزىن اشىپ كەتتى. سويتسە، بۇل ءبىزدىڭ قانىمىزدا بار ەكەنى ايقىن كورىنىپ تۇردى. گەنەتيكالىق جادى، ۇلتتىق كود دەيمىز عوي، ياعني بار نارسەنى جاڭعىرتۋ. ۇيرەنگەندە وسىنىڭ بارلىعى ۇزاق جاتتىعۋمەن كەلەدى، ءبىراق قازاق جىگىتتەرى ءبىر-ەكى كورسەتكەندە بىردەن ناتيجە كورسەتە باستادى»، - دەدى ب. تىلەۋحان ورتالىق كوممۋنيكاتسيالار قىزمەتىندە استانادا وتەتىن «التىن جەبە» حالىقارالىق تۋرنيرگە ارنالعان باسپا ءسوز ءماسليحاتىندا.
ونىڭ سوزىنە قاراعاندا، بۇگىندە ۇلتتىق سپورتقا حالىقتىڭ قىزىعۋشىلىعى وتە جاقسى بولىپ وتىر. دەگەنمەن دە بۇل باعىتتا ءالى ناسيحاتتاۋ شارالارى قاجەتتىلىك ەتۋدە. بەلگىلى بولعانداي، «ەكسپو-2017» حالىقارالىق كورمەسى اياسىنداعى تاعى ءبىر حالىقارالىق باسەكەنىڭ تۋ كوتەرەر مەزگىلى تاياۋ قالدى.
تامىزدىڭ 12-13 -كۇندەرى استاناداعى «قازانات» اتشابارىندا وتەتىن جامبى اتۋدان «التىن جەبە» اتتى 1- حالىقارالىق تۋرنيرگە الەمنىڭ جيىرماعا جۋىق مەملەكەتىنىڭ مەرگەندەرى كەلەدى دەپ كۇتىلۋدە. ءبىزدىڭ ەلدەن «التىن جەبەدە» بەس سپورتشى باق سىناماق. قازاقستاننىڭ «جامبى اتۋ» ەرەسەكتەر قۇراما كومانداسىنىڭ كاپيتانى، جامبى اتۋدان قازاقستان رەسپۋبليكاسى چەمپيوناتىنىڭ بىرنەشە دۇركىن جۇلدەگەرى، حالىقارالىق مەرگەندەر سايىسىنا قاتىسۋشى، 2016 -جىلعى «ۇلى دالا ويىندارى» فەستيۆالىنىڭ جەڭىمپازى، «التىن تۇعىر» يەگەرى اتانعان ەلدوس باداشەۆ جانە ەلىشىلىك چەمپيوناتتا توپ جارىپ جۇرگەن ساڭلاقتارىمىز سارىباي ايتبەك، ايكوز ەرالحان، ابزال تۋلىبەكوۆ، بەكقالي ۇزدەنبايەۆ ەل نامىسىن قورعايدى.
قازىرگى كەزدە ءبىرقاتار ەلدەن قاتىسۋشىلار كەلىپ جاتىر. وسى جارىسقا تەك جاپونيادان 13 ادام كەلەدى دەپ كۇتىلۋدە. قازاق ەلىندە تۇڭعىش ۇيىمداستىرىلعان «التىن جەبە» تۋرنيرىنىڭ جۇلدە قورى دا قوماقتى. بەس ورىنعا دەيىن بايگە بار. باس جۇلدە - 5 مىڭ دوللار. ەكىنشى ورىن - 3 مىڭ دوللار. ءۇشىنشى - 2 مىڭ دوللار. ءتورتىنشى ورىن - 1 مىڭ دوللار. بەسىنشى ورىن - 500 دوللار. شارانى ق ر مادەنيەت جانە سپورت مينيسترلىگى، «ۇلتتىق سپورت تۇرلەرى قاۋىمداستىعى» جانە «تۇركى حالىقتارىنىڭ ءداستۇرلى سپورت تۇرلەرى قاۋىمداستىعى» ۇيىمداستىرىپ وتىر.
اۆتور: رۋسلان عابباسوۆ