وڭتۇستىك قازاقستاندا قىتايلىق كاسىپكەرلەردىڭ باستاماسىمەن ەكى زاۋىت سالىنادى

شىمكەنت. قازاقپارات - قىتايلىق كاسىپكەرلەر وڭتۇستىك قازاقستان وبلىسىندا بيوەتانول ءوندىرۋ زاۋىتى مەن فوسفور ءوندىرىسىنىڭ قالدىقتارىن قايتا وڭدەۋدەن وتكىزەتىن ءوندىرىس وشاعىن ىسكە قوسپاقشى.

 كورشى ەلدىڭ ينۆەستورلارى بيوەتانول وندىرىسىنە وتىرار اۋدانىن، ال فوسفور قالدىقتارىن وڭدەۋدە سوزاق ءوڭىرىن قولايلى كورىپ وتىر.

بۇگىن بۇل تۋرالى وڭتۇستىك قازاقستان وبلىسىنىڭ اكىمى مەن قىتاي فتورسەليكوندىق ءوندىرىسى قاۋىمداستىعىنىڭ ديرەكتورى سيانجۋن تساو باستاعان دەلەگاتسيانىڭ كەزدەسۋىندە ءمالىم بولدى، دەپ حابارلايدى «قازاقپارات ح ا ا ءتىلشىسى.

كەزدەسۋدە قىتايلىق دەلەگاتسيانى باستاپ كەلگەن سيانجۋن تساو نەگىزگى ەكى باعىتتا زاۋىت قۇرىلىسىن باستاۋعا مۇددەلى ەكەندىكتەرىن جەتكىزدى.

«ءبىز وڭتۇستىك قازاقستان وبلىسىندا نەگىزگى ەكى باعىتتى دامىتۋدى جوسپارلاپ وتىرمىز. ونىڭ ءبىرى - بيوەتانول ءوندىرۋ ءىسى، ال ەكىنشىسى فوسفور قالدىقتارىن قايتا وڭدەۋدەن وتكىزۋ. ەگەر ەكىجاقتى كەلىسىمدەر ورىندالىپ جاتسا، ەكى زاۋىتتىڭ قۇرىلىسىن تەز ارادا باستاۋدى ءجون كورىپ وتىرمىز»، - دەدى ول.

ءوز كەزەگىندە ءوڭىر باسشىسى جانسەيىت تۇيمەبايەۆ شەتەلدىك ينۆەستورلارعا وبلىستىڭ ينۆەستيتسيالىق تارتىمدىلىعى مەن يندۋستريالدى- يننوۆاتسيالىق جوبالاردى ىسكە اسىراتىن ايماقتاردىڭ الەۋەتىن باياندادى.

وبلىس ەكونوميكاسىن ورگە سۇيرەپ كەلە جاتقان سالالارعا توقتالعان اكىم ينۆەستيتسيا تارتۋ بويىنشا جەرگىلىكتى بيلىك تاراپىنان كورسەتىلەتىن جەڭىلدىكتەر مەن مۇمكىندىكتەرگە كەڭىنەن توقتالدى. «ەلگە ينۆەستيتسيا تارتۋ - ەكونوميكانىڭ ەڭ نەگىزگى تەتىگى. وسىنى ەسكەرە وتىرىپ ءبىز كاسىپكەرلەرگە بارىنشا قولداۋ ءبىلدىرىپ وتىرمىز. وڭىرىمىزدە 11 يندۋستريالىق 1 ارنايى ەكونوميكالىق ايماعىمىز جۇمىس ىستەيدى. شەتەلدىك ينۆەستورلار كەدەندىك، مۇلىكتىك سالىقتاردان بوساتىلادى. سونداي-اق جەر تەلىمى، ينفراقۇرىلىمدىق قاجەتتىلىكتەردىڭ بارىمەن تولىق قامتاماسىز ەتەتىن بولامىز»، - دەدى جانسەيىت قانسەيىت ۇلى.

شەتەلدىك ينۆەستورلاردىڭ ەكى جوباسىنا دا قولداۋ بىلدىرگەن وبلىس اكىمى ءتيىستى باسقارما باسشىلارىنا ناقتى تاپسىرمالار جۇكتەدى. ءتيىستى قۇجاتتاردى تەزدەتىپ ازىرلەپ، قاجەتتى جەر تەلىمدەرىن ءبولۋدى جانە دە ەكى زاۋىتتىڭ دا ىرگەتاسىن بيىل قالاۋدى تاپسىردى.

ايتا كەتەيىك، بۇگىنگى تاڭدا الەمدە بيوەتانول ءوندىرىسىنىڭ ءورىسى كەڭىپ، پايدالانۋشىلار قاتارى ارتىپ كەلەدى. عىلىم تىلىمەن ايتساق، بيوەتانول دەگەنىمىز تەحنيكالىق ابسوليۋتتەندىرىلگەن سپيرت قۇرامى 99,9 گرادۋستى قۇرايدى.

اتالمىش جاڭا وتىن ءتۇرى جانار-جاعار مايعا قاراعاندا، اۋانى لاستامايدى جانە پارنيكتىك گازداردى دا بولمەيدى. ءبىر سوزبەن ايتقاندا ادامزات بالاسىنا دا، قورشاعان ورتاعا دا زيانسىز وتىن. قىتايلىق ينۆەستورلار بيوەتانول ءوندىرۋ ىسىندە وڭتۇستىكقازاقستاندىق جۇگەرى مەن بيداي، ارپا قالدىقتارىن پايدالانباق.

بۇل ءوز كەزەگىندە وڭتۇستىك قازاقستان وبلىسىنىڭ اۋىل شارۋاشىلىق سالاسىن دامىتۋدىڭ ەرەكشە جولى بولعالى وتىر.