ايىمگۇل سادبەكوۆا ماحاببات جولىندا باسىنان كەشكەن قيىندىقتارى تۋرالى سىر شەرتىپ، اناسىنىڭ اق باتاسىن الۋدىڭ قانشالىقتى قيىن بولعانىن ايتىپ بەردى دەپ حابارلايدى NUR. KZ.
- ايىمگۇل، قالاۋىڭىز نەلىكتەن وزگە ۇلتتىڭ ازاماتىنا ءتۇستى؟
- ءيا، جولداسىم ورىس ۇلتىنان. ەسىمى - نيكولاي. ارينە، باسىندا وزگە ۇلت وكىلىنە تۇرمىسقا شىعامىن دەپ ويلاماعان ەدىم. الايدا، تاعدىردىڭ جازعانى بولار، ورىس ازاماتىنا تۇرمىسقا شىقتىم. ءبىز نەگىزىندە جۇمىس ورنىندا تانىسقان بولاتىنبىز، العاشىندا تەك دوس رەتىندە ارالاسىپ جۇردىك.
كەيىن ونىڭ بويىنان قاراپايىمدىلىق، مەيىرىمدىلىك سياقتى ىزگى قاسيەتتەردى بايقاي باستادىم. جولداسىم مەنىڭ جۇرەگىمدى وسى ەرەكشە مىنەزىمەن دە جاۋلاپ العان شىعار. ول مەنى ۇنەمى الاقانىنا سالىپ، ايالاپ، سىيلاي ءبىلدى. ونىڭ جانىندا مەن ءوزىمدى ءالى كۇنگە دەيىن بالاشا سەزىنەمىن.
- اتا-اناڭىز ورىس ۇلتىنىڭ ازاماتىنا تۇرمىسقا شىعۋ تۋرالى شەشىمىڭىزدى قالاي قابىلدادى؟ قارسى بولعان جوق پا؟
- ارينە، العاشىندا انام قارسى بولدى. انام ءتىپتى، ونىمەن دوستاسىپ جۇرگەنىمدى ءبىلىپ، ماعان نيكولايمەن كەزدەسۋگە رۇقسات بەرمەگەن كۇندەرى دە بولدى. انام قارسى بولعاندىقتان تالاي رەت نيكولايمەن دوستىعىمىزدى ۇزۋگە تۋرا كەلدى. بۇل كەزەڭ مەن ءۇشىن وتە اۋىر ءتيدى. ياعني، مەن جاقىندارىم مەن سۇيىكتىم سياقتى ەكى وتتىڭ اراسىندا قالدىم.
مەن ءۇشىن اتا-انامنىڭ باتاسىن الىپ، تۇرمىس قۇرۋ ماسەلەسى قاشان دا العاشقى ورىندا تۇراتىن. سوندىقتان دا بولار، سول جىلى قاتتى اۋىردىم. انام مەنىڭ اۋىرعانىمدى كورىپ جانە جاسىم دا كەلىپ قالعاندىقتان (اۆت. ول كەزدە جاسى 28 دە ەدى) ءوز كەلىسىمىن بەردى. ءسويتىپ، وتاۋ قۇردىق. ال، جولداسىمنىڭ تۋىستارى نەكەمىزگە قارسى بولماپتى، ولار تەك «سەن باقىتتى بولساڭ بولدى» دەپ جاۋاپ بەرىپتى.
- قازىر قاي ءدىندى ۇستاناسىز؟ جولداسىڭىزدىڭ ءدىنىن قابىلدادىڭىز با؟
- جوق، ءوز دىنىمدە قالدىم، كەرىسىنشە جۇبايىم «يسلام» ءدىنىن قابىلدادى.
- ارالاس نەكەنى بۇگىندە سىنايتىندان وتە كوپ. ونداي پىكىرلەردى قالاي قابىلدادىڭىز؟ اۋىر تيمەدى مە؟
- ول ماسەلەنى دە باسىمىزدان وتكەردىك. اسىرەسە، نيكولايمەن كەزدەسىپ جۇرگەن كەزىمىزدە، تانىستارىم مەن جاقىن اپكەلەرىمنىڭ سىنىنا قالعان بولاتىنمىن. ارينە، جاقىندارىمنىڭ وسىلاي سىنعا الىپ جاتقانى جانىما قاتتى باتاتىن ەدى. ءبىراق، ول مەنىڭ ءومىرىم عوي، مەنىڭ تاڭداۋىم. سوندىقتان، ءومىرىمدى كىممەن جانە قالاي سۇرەتىنىم ولاردىڭ ەمەس، مەنىڭ جەكە ماسەلەم دەپ ويلايمىن. نيكولاي بۋراباي وڭىرىنەن، قازاقشا داستۇرلەردىڭ ءبارىن بىلەدى دەسەم ارتىق ايتپاسپىن. قازاقشاسى دا ورتاشا، كەيدە ازداپ قازاقشا سويلەيتىنى بار.