«كەزىندە الىپ قاشقان»، «وندا تۇرعان ەشتەڭە جوق»، «ءالى-اق باقىتتى بولىپ كەتەسىڭ»...
سوندا قانداي باقىت تۋرالى ايتىپ وتىرمىز؟ الىپ قاشقاننان كەيىن باقىتتى بولىپ كەتەتىن وتباسىنا قاراپ، ءبىر كورگەننەن عاشىق بولۋ دەگەن بوس ءسوز ەكەنىن اڭعارۋعا بولادى. سەبەبى ءومىرى كورمەگەن، تانىماعان ادامعا كوز ۇيرەتىپ، ونىمەن جۇرە سىيلاسقان سوڭ ماحاببات ويانسا، بۇل ناعىز سەزىم دەپ ايتا الامىز با؟! الىپ قاشۋ ءدال قازىرگى تاڭدا جابايىلىقتىڭ ءبىر بەلگىسى. سەبەبى تاپا- تال تۇستە ءوزى جاس، ءالى ءومىر كورمەگەن، ورىمدەي قىزدى الىپ قاشىپ، ايەل قىلىپ الۋ قاتىگەزدىك ەمەس پە؟! «سەبەبى سۇيەمىن» دەيسىز.
ال ونىڭ سەزىمى شە؟ قىزدىڭ ماحابباتى شە؟ ءسىز سۇيسەڭىز بولدى ما؟! بۇل دامىعان قوعام ءۇشىن ءالى دە كوشپەندى دالانىڭ يدەولوگياسىنان ارىلا الماي، جابايىلىقتىڭ كەبىن كيىپ جۇرگەنمەن بىردەي. قىز كونبەدى دەگەن كۇننىڭ وزىندە، ونىڭ اتا- اناسى شە؟ باعىپ-قاققان اكەسى مەن شەشەسى قىزدارىنىڭ قولدارىنان ۇشىپ شىققانىن قالاپ، اڭساپ جۇرگەن كەزدە تاعدىرىن كەلىپ ءسىز بىت- شىت قىلاسىز. ال ەندى ايتىڭىزشى، بۇل باقىت پا؟! ەڭ قىزىعى الىپ قاشقاننان كەيىنگى قىزداردىڭ اراسىندا بولاتىن اڭگىمە مۇلدە باسقا. «ۇيرەنىپ كەتتىك»، «ماحاببات دەگەن سىيلاستىق قوي»، «كونبەي قايدا بارامىز» دەيدى.
ءيا، كونۋگە تۋرا كەلەدى. سەبەبى ءداستۇر مەن تاربيەدەن اسا المايتىن حالىقپىز. اپامىز اق جاۋلىعىن جەلبىرەتىپ، بوساعادا جاتسا، قۇراندى قويىپ قويسا قالاي اتتاپ كەتەسىز. ودان قالا بەردى جاقسى كورىپ جۇرگەن جانىڭىز كەلىپ ءسىزدى الىپ كەتكەنشە ءتۇن اۋىپ كەتسە، «قىزدىڭ ارى بۇزىلدى» دەپ توقتايمىز.
ءبىر سوزبەن ايتقان كەزدە الىپ قاشقان قىزدى قورعايتىن زاڭ عانا. ءبىراق زاڭمەن اردىڭ ماسەلەسىن، تاعدىردىڭ ماسەلەسىن قاشانعى شەشەسىز. ىشتەي ادامدا سانا-سەزىم بولۋ كەرەك. سونىمەن تۇيىنگە كەلەيىك. الىپ قاشىپ كەتكەن قىز باقىتتى بولا الا ما؟ ەكى جاقتى جاۋاپ بەرۋگە بولادى. باقىتتى بولادى جانە باقىتتى بولا المايدى. تاپتىق قوعامدا ءالى دە ءومىر ءسۇرىپ جاتقانىمىز وتىرىك ەمەس. سەبەبى قالتالى ادامنىڭ قىزىن الىپ قاشىپ كەتىڭىزشى، باسىڭىزدى داۋعا قالدىرىپ قىزىن الىپ كەلەدى.
ال قاراپايىم وتباسىنىڭ قىزىن الىپ كەتسەڭىز، «ۇيات قوي»، «باقىتتى بولسىن» دەپ ارتىنان اتا- اناسى ىشتەي قۋانىپ، سىرتتاي جىلاپ شىعارىپ سالادى. مۇنى قالاي ءتۇسىنۋ كەرەك؟ ەندەشە «ماحاببات»، «باقىت» دەگەن سوزدەردىڭ قادىرىن قاجەتتىلىك پەن جاقسى تۇرمىس باسىپ كەتكەنى عوي. ماحابباتتىڭ زاڭدىلىعىنا سالساڭىز، الىپ قاشىپ كەتكەن قىز ەشقاشان باقىتتى بولا المايدى.
سەبەبى ول سۇيگەن جوق، كورگەن جوق، تانىعان جوق. سەزىنىپ ۇلگەرگەن جوق. ال الەۋمەتتىك نە تۇرمىستىق جاعدايعا قاراي بۇل دۇرىس شەشىم ەكەن. قالاي الىپ قاراساق تا ماحاببات قۇدىرەتتى كۇش. ال ونى قولدان جاساپ الۋ - جاساندىلىق.
Massaget.kz