قازاقستاندا پوليتسەيلەر قانداي سەبەپپەن ءجيى جۇمىستان شىعارىلادى؟
بۇل تۋرالى بۇگىن ۇكىمەت ۇيىندە «100 ناقتى قادام» ۇلت جوسپارىنىڭ ىسكە اسىرىلۋ بارىسىنا ارنالعان باسپا ءسوز ءماسليحاتىندا ق ر ىشكى ىستەر ۆيتسە-ءمينيسترى ەرلان تۇرعىمبايەۆ ءمالىم ەتتى، دەپ حابارلايدى قازاقپارات.
ونىڭ ايتۋىنشا، ق ر ىشكى ىستەر مينيسترلىگى جانىنداعى قوعامدىق كەڭەس ازاماتتاردىڭ وتىنىشتەرىن، ونىڭ ىشىندە قىزمەتكەرلەردىڭ ادەپ ءىس-ارەكەتىنە قاتىستى شاعىمدارىن قارايدى.
اعىمداعى جىلدىڭ باسىنان بەرى كەڭەسكە 21 ءوتىنىش تۇسسە، ونىڭ ەكەۋى قىزمەتكەرلەردىڭ جالپى قابىلدانعان ءجۇرىس-تۇرىس ەرەجەسىن بۇزۋ ماسەلەسىنە قاتىستى بولدى.
«مۇنداي جايت وڭىرلەردە دە قالىپتاسقان. ىشكى ىستەر دەپارتامەنتى جانىنداعى كونسۋلتاتيۆتىك-كەڭەسۋ ورىندارى پوليتسيا قىزمەتكەرلەرىنە قاتىستى 20 ءوتىنىشتى قارادى. قاراۋ ناتيجەسىندە 12 لاۋازىمدى تۇلعا تارتىپتىك جازاعا تارتىلىپ، 4 قىزمەتكەر ىشكى ىستەر ورگاندارىنان شىعارىلدى»، - دەدى تۇرعىمبايەۆ.
ۆيتسە-ءمينيستردىڭ سوزىنە قاراعاندا، قۇقىق قورعاۋ ورگاندارىنىڭ قىزمەتكەرلەرىنە قاتىستى ازاماتتاردىڭ شاعىمدارى مەن ارىزدارىن قاراۋ بولىگىندەگى جۇمىستار قاتاڭداتىلادى.
«قىزمەت بابىن تەرىس پايدالانۋ، بيلىگىن اسىرا قولدانۋ جانە دورەكىلىك - بۇل بىزگە تۇسەتىن شاعىمداردىڭ نەگىزگى ءۇش كريتەريى»، - دەدى ول.
اۆتور: مارلان جيەمباي