قازاقستان يمامدارىنا قانشا جالاقى تولەنەدى

استانا. قازاقپارات - ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ قازاقستان يمامدارىنىڭ جالاقى مولشەرىن جاريالادى، دەپ حابارلايدى «قازاقپارات» ح ا ا ءتىلشىسى.

 «يمامداردىڭ جالاقىسى تىكەلەي ساداقا جاشىكتەرىنە تۇسكەن قاراجاتقا بايلانىستى. قالالىق جانە وبلىستىق مەشىتتەردە يمامداردىڭ ايلىق جالاقىسى 70 مىڭنان 80 مىڭعا، اۋداندىق مەشىتتەردە - 40 مىڭنان 50 مىڭعا، اۋىلدىق مەشىتتەردە - 20 مىڭنان 30 مىڭ تەڭگەگە دەيىن بەكىتىلگەن»، - دەدى ن. ەرمەكبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ءمينيستردىڭ ايتۋىنشا، اتالعان جالاقى كولەمى تۇراقتى ەمەس. قازاقستان مۇسىلماندارى ءدىني باسقارماسى يمامداردىڭ ەڭبەكتەرى مەن مەشىتتەردىڭ قىزمەتكەرلەرىنە تولەيتىن ارنايى قاراجاتتى رەسمي تۇردە بولمەيدى جانە بيۋدجەتىندە بۇل ماسەلە قاراستىرىلماعان. جەرگىلىكتى اكىمدىكتەر ق م د ب وڭىرلىك بولىمدەرىنە تۇراقسىز جانە جۇيەسىز تۇردە كومەك كورسەتەدى.

 «مۇنداي از ءارى تۇراقسىز جالاقىمەن يمامدار قوعامدىق قاۋىپسىزدىككە قاتىستى كۇندەلىكتى مىندەتتەرىن تولىعىمەن شەشە المايدى. بىلىكتى يمامداردى اۋىلدىق مەشىتتەرگە تارتۋ قيىندىق تۋعىزىپ جاتىر. ونىڭ ۇستىنە يمامداردىڭ كوپشىلىگى ورتا بىلىممەن عانا شەكتەلگەن. بۇل يمامداردىڭ اۋديتورياسىن كەڭەيتۋگە جانە دەسترۋكتيۆتى ءدىني اعىمنىڭ وكىلدەرىنە قارسى تۇرۋعا مۇمكىندىك بەرمەيدى. وسىنداي تەرىس فاكتورلاردى دەسترۋكتيۆتىك ءدىني اعىمداردىڭ وكىلدەرى ءداستۇرلى يسلام ءدىنىنىڭ بەدەلىن السىرەتۋگە جانە ءدىندارلار اراسىندا وزدەرىنىڭ ىقپالىن ارتتىرۋ ءۇشىن ءتيىمدى قولدانادى»، - دەپ تولىقتىردى مينيستر.

 مينيسترلىك دەرەكتەرىنە سايكەس، قازىرگى ۋاقىتتا 158 يمامنىڭ جەتىسپەۋشىلىگى سەزىلىپ وتىر. اسىرەسە، اقمولا وبلىسىندا - 40 يمام، وڭتۇستىك قازاقستان وبلىسىندا - 37 يمام جانە شىعىس قازاقستان وبلىسىندا - 20 يمام قاجەت.

 اۆتور: ايجان سەرىكجان قىزى