بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا ق ر ينۆەستيتسيالار جانە دامۋ ءبىرىنشى ۆيتسە- ءمينيسترى اليك ايداربايەۆ ءمالىم ەتتى، دەپ حابارلايدى قازاقپارات. «وزدەرىڭىز دە جاقسى بىلەسىزدەر، كەز كەلگەن ەلدە جولاۋشىلار تاسىمالىنان بولەك جۇك تاسىمالداۋمەن اينالىساتىن كومپانيالار بولادى. بۇگىنگى كۇنگە دەيىن قازاقستاندا، بىزدە مۇنداي كومپانيا بولعان ەمەس. ەندى مىنە «قازاقستان تەمىر جولى» «ەير استانامەن» بىرلەسىپ، سونداي كومپانيا قۇراتىن بولادى. بۇل جاڭا كومپانيا. ول اعىمداعى جىلى قۇرىلادى. بۇگىنگى كۇنى قازاقستان تەمىر جولى وسى باعىتتا جۇمىس ىستەيتىن سەرىكتەس ىزدەستىرۋدە. ءبىزدىڭ جوسپارىمىز بويىنشا كومپانيانى وسى جىلدىڭ سوڭىنا دەيىن قۇرۋ قاجەت. جۇمىستاردى باستاپ كەتۋ ءۇشىن باستاپقىدا تىم بولماعاندا 2 اۋە كەمەسىن جالعا الۋ نەمەسە ساتىپ الۋ كەرەك. كومپانيانىڭ دامۋ ستراتەگياسىنا سايكەس ول بولاشاقتا جۇك تاسىمالى نارىعىندا لايىقتى ورىن الادى دەپ كۇتىلۋدە»، - دەدى اليك ايداربايەۆ.
ونىڭ اتاپ وتۋىنشە، بۇگىنگى كۇنى ەلىمىزدەگى بارلىق جۇك تاسىمالى شەتەلدىك كومپانيالارمەن جۇزەگە اسىرىلۋدا. سوندىقتان وسى ولقىلىقتىڭ ورنىن تولتىرۋ ءۇشىن اتالعان كومپانيا قۇرىلىپ وتىر. «ياعني، كومپانيا ستراتەگياسى وتاندىق جۇك تاسىمالداۋشىنى دامىتۋعا باعىتتالعان. تولىقتاي العاندا، بۇل قازاقستاندى كولىكتىك- ترانزيتتىك الەۋەتى دامىعان ەل رەتىندە دامىتۋ ستراتەگياسىنا ساي كەلەدى. بۇگىنگى كۇنى ەلىمىز ارقىلى وتەتىن ترانزيتتىك جۇكتەردىڭ كولەمى ارتا تۇسۋدە. كولىكتىك ينفراقۇرىلىمدى دامىتۋعا دا بيۋدجەتتىڭ مول قارجىسى قۇيىلۋدا»، - دەدى ءبىرىنشى ۆيتسە- مينيستر.
اۆتور: مارلان جيەمباي