تەڭگە باعامىنا بولجام جاسالدى

استانا. قازاقپارات - مۇناي باعاسىنىڭ وسىمىنە قاراماستان تەڭگەنىڭ السىرەۋى قازاقستان بيۋدجەتىنىڭ بۇعان دەيىنگى جىلدارداعىداي مۇنايدان تۇسەتىن كىرىسكە بارىنشا تاۋەلدى بولماۋىمەن بايلانىستى ورىن الۋى ىقتيمال.

مۇنداي پىكىردى «الپاري» كومپانياسىنىڭ ساراپتامالىق دەپارتامەنتى ديرەكتورىنىڭ ورىنباسارى ناتاليا ميلچاكوۆا ءبىلدىردى، دەپ حابارلايدى قازاقپارات.

«نەگىزىنەن سوڭعى بىرنەشە جىل بويى مۇناي باعاسىنىڭ ديناميكاسى مەن تەڭگەنىڭ ايىرباس باعامى اراسىندا تۇراقتى ءوزارا بايلانىس جوق. مۇنىڭ قازاقستان بيۋدجەتىنىڭ بۇعان دەيىنگى جىلدارداعىداي مۇنايدان تۇسەتىن كىرىسكە بارىنشا تاۋەلدى بولماۋىمەن بايلانىسى باسىمىراق بولىپ وتىر. بۇگىنگى كۇنى مۇناي مەن گاز ەكسپورتىنان تۇسەتىن كىرىس شامامەن 35-37 پايىزدى قۇرايدى»، - دەدى ناتاليا ميلچاكوۆا.

ونىڭ ايتۋىنشا، ۆاليۋتالىق ترەيدەرلەر ءالى دە بولسا تەڭگەگە «مۇناي» ۆاليۋتاسىنىڭ ءبىرى رەتىندە قاراۋعا داعدىلانعان. سوڭعى بىرنەشە جىل بويى تەڭگە باعامىنا رۋبلدىڭ ايىرباس باعامىنىڭ ىقپالى ءبىرشاما جوعارى بولۋدا.

دەگەنمەن ساراپشى رۋبلگە تەڭگە باعامىنىڭ تىكەلەي ىقپالى جوق ەكەندىگىن دە باسا ايتتى. رەسەي رۋبلى قازاقستاندىق تەڭگەگە قاراعاندا ءبىرشاما قۇبىلمالى ۆاليۋتا سانالادى.

«الايدا كۇنى بويعى ساۋدا بارىسىندا رۋبل مەن تەڭگەنىڭ ءبىر باعىتتا بولاتىندىعى ءجيى كەزدەسەدى. ال بۇل ۆاليۋتا نارىعىنىڭ رەسەي مەن قازاقستان ەكونوميكالارىن ءبىر- بىرىمەن تىعىز تاۋەلدى دەپ قابىلدايتىندىعىن بىلدىرەدى. بۇل تاڭ قالارلىق جايت ەمەس. ويتكەنى، قازاقستان مەن رەسەيدى ەۋرازيالىق ەكونوميكالىق وداققا مۇشەلىك بىرىكتىرەدى. ءبىراق قازاقستان مەن رەسەي مۇناي مەن گاز ەكسپورتى سالاسىندا باسەكەلەس سانالادى. ەگەر، ماسەلەن رەسەي ءرۋبلدى ديەۆالۆاتسيالاسا، وندا ونىڭ ەكسپورتتىق تاۋارلارى اۆتوماتتى تۇردە باسەكەلەستەرىنىڭ ءدال سونداي تاۋارلارىنا قاراعاندا باسەكەگە قابىلەتتى بولىپ شىعا كەلەدى»، - دەدى ول.

ناتاليا ميلچاكوۆانىڭ پايىمىنشا، 2014-2015 -جىلداردا رەسەيلىك رۋبلدىڭ دەۆالۆاتسياعا ۇشىراۋىنا 2015 -جىلى قازاقستان تەڭگەسىنىڭ دەۆالۆاتسيالانۋى نەگىز بولعان. قازىرگى ۋاقىتتا امەريكا قۇراما شتتاتتارى رەسەي فەدەراتسياسىنا قارسى سانكسيالارىن قاتاڭداتۋعا نيەت تانىتىپ وتىر.

وسىعان بايلانىستى قازاقستان سانكسيالاردىڭ قاتاڭداۋى رەسەيلىك ەكونوميكاعا تەرىس ىقپال ەتۋى مۇمكىن دەپ قاۋىپتەنۋدە. مۇنداي جاعدايدا رەسەيگە ەكسپورتتالاتىن قازاقستان تاۋارلارىنا سۇرانىستىڭ تومەندەۋى ىقتيمال.

«ءبىزدىڭ بولجامىمىزشا، تامىز ايىنىڭ باسىندا دوللارعا شاققانداعى تەڭگە باعامى 326-329 تەڭگە، رۋبلگە شاققاندا 5,48-5,62 تەڭگە بولادى»، - دەدى ساراپشى.

اۆتور: مارلان جيەمباي