ونىڭ ايتۋىنشا، بۇگىنگى انالار ۇلدارىن ارتىعىراق جاقسى كورەدى، سولارعا كوبىرەك قامقورلىق تانىتادى. ال سالدارىنان ءوز ىسىنە ءوزى جاۋاپ بەرە المايتىن، اتا-انا مەن قارىنداسقا قامقور بولا المايتىن ءالسىز ەركەكتەر سانى ارتىپ كەلەدى.
تەلەجۇرگىزۋشىنىڭ ايتۋىنشا، قاشان دا قىز بالاعا قوناق رەتىندە قاراعان قازاق حالقى بۇل ۇستانىمدى كەرى پايدالانا باستادى. ياعني، «ءبارىبىر وزگەنىڭ وتىن تۇتاتادى» دەگەن انالار بۇگىندە قىزدان گورى ۇلىنا كوبىرەك كوڭىل بولەتىن بولعان.
«بۇگىنگى تاڭدا انالار ۇل بالالاردى ارتىعىراق جاقسى كورىپ، سولارعا كوبىرەك قامقور بولادى دەگەن پىكىرمەن كەلىسەمىن. قازىرگى زاماندا قىزداردىڭ ءبىلىمى جوعارى، ولار تابىستى، جاس ءارى اتا-اناسىمەن بىرگە تۇرسا دا، وزدەرىن قامتاماسىز ەتە الادى. ياعني قىز قامقورلىقتى قاجەت ەتپەيدى، ودا ونسىز دا بارلىعى بار. بۇرىنىراقتا قىز بالانىڭ قايدا جۇرگەنىن، ونىڭ ءجۇرىس-تۇرىسىن، كىممەن ارالاسىپ جۇرگەنىن، ونىڭ ارتىق رەت ەشكىممەن سويلەسپەۋىن اكەسى نە اعاسى قاداعالاپ وتىراتىن. ال مىنا زاماندا قىزىنىڭ نەمەسە قارىنداسىنىڭ ارتىنان جۇرەتىن ەر ادامدار از. مۇنداي ءۇردىس كەيبىر كاۆكاز ەلدەرى مەن تۇركيانىڭ كەي ايماقتارىندا ساقتالعان. ال ءبىز قىزدارعا ازىراق قامقورلىق كورسەتەتىن بولعان سياقتىمىز - ول كەشكى ۋاقىتتا ۇيگە ءوزى قايتادى، اۋىر سومكەلەردى دە ءوزى كوتەرەدى. ءتىپتى، اعاسى بار قىزداردىڭ وزدەرى سولاي!
ال انالاردىڭ ەر بالالارعا اسا كوپ قامقورلىق تانىتۋى ولاردىڭ ازامات رەتىندە دامۋىنا كەرى اسەرىن تيگىزەدى. ولار ءومىردىڭ قاتال تارتىبىنە بەيىمدەلە الماي قينالادى، جاۋاپكەرشىلىكتى، ماڭىزدى شەشىمدى تالاپ ەتەتىن قيىن جاعدايعا تاپ بولسا اداسادى. قازىرگى جىگىتتەر ءساندى كيىنىپ، وزدەرىنە كۇتىم جاساعاندى ۇناتادى. بۇل رەتتە ۇقىپتى بولۋ - بولەك اڭگىمە، ال دۇكەننەن شىقپاي قويۋ - بىزگە، ياعني ايەلدەر قاۋىمىنا ءتان قاسيەت ءھام ادەت»، - دەدى اعىنان جارىلىپ ول.
بۇدان كەيىن تەلەجۇرگىزۋشى ءالسىز ەركەكتەردىڭ قايدان پايدا بولاتىنىن ءتۇسىندىردى.
اقىرىندا ۇلىمىزدى الپەشتەپ، ەركەلەتىپ، ماپەلەپ وسىرەمىز، ال قىزىمىزدى ابدەن شىنىقتىرامىز. سوسىن ۇلىمىز ۇيلەنگەن سوڭ، اتا-اناسىن ۇمىتىپ، قايىن-جۇرتقا قىزمەت ەتە باستاسا تاڭعالامىز! سەبەبى اتا-اناعا، اپكە-قارىنداسقا قامقور بولۋ كەرەكتىگىن وعان جاستاي ەشكىم ۇيرەتكەن جوق. ول تەك وزگەلەردەن الاتىن ماحاببات پەن نازاردى، ماتەريالدىق رەسۋرستاردى «تۇتىنىپ» ۇيرەندى. سوندىقتان وتباسىلى بولعان سوڭ ول جاڭا ايەلدىڭ «قامقورلىعىنا» وتەدى، بار بولعانى وسى»، - دەيدى ءلايلا سۇلتان قىزى.
دەرەككوز: Stan.kz