قوس ازاماتتىعى بار ەكى كەلىنشەك قازاقستاننان شەتتەتىلدى

استانا. قازاقپارات - الماتى اۋەجايىندا قازاقستان زاڭىن بۇزعان تۇركيانىڭ ەكى ازاماتشاسى ۇستالدى، دەپ حابارلادى «قازاقپارات» ح ا ا كولىكتەگى ءى ءى د- نىڭ باسپا ءسوز قىزمەتىنە سىلتەمە جاساپ.

«الماتى اۋەجايىنداعى ىشكى ىستەر جەلىلىك ءبولىمىنىڭ قىزمەتكەرلەرى قازاقستان رەسپۋبليكاسىنىڭ ازاماتتىعى تۋرالى زاڭنامانى بۇزعانى ءۇشىن(قوس ازاماتتىعى بار - رەد.) «كيەۆ- الماتى» رەيسىمەن ۇشىپ كەلگەن 44 جاستاعى تۇرىك ازاماتشاسىن اكىمشىلىك جاۋاپكەرشىلىككە تارتتى.

كولىك پوليتسەيلەرى وعان قاتىستى ق ر ا ق ت ك 496-بابى 2-بولىگى بويىنشا اكىمشىلىك حاتتاما تولتىردى. الماتى مامانداندىرىلعان اۋدانارالىق اكىمشىلىك سوتىنىڭ قاۋلىسىمەن جوعارىدا ايتىلعان ازاماتشا ەلدەن شەتتەتىلدى»، - دەپ حابارلادى كولىكتەگى ءى ءى د- دەن. دەپارتامەنتتىڭ اقپاراتىنا سايكەس سول كۇنى الماتى اۋەجايىنا قونعان «ىستانبۇل- الماتى» رەيسىنەن جەلىلىك ءى ءى ب قىزمەتكەرلەرى وسىنداي زاڭ بۇزۋشىلىق جاساعانى ءۇشىن 1981 -جىلعى تۇركيانىڭ تاعى ءبىر ازاماتشاسىن جاۋاپكەرشىلىككە تارتتى. الماتى قالاسى مامانداندىرىلعان اۋدانارالىق اكىمشىلىك سوتىنىڭ قاۋلىسىمەن ۇستالعان ايەل قازاقستاننان شىعارىلىپ جىبەرىلدى.

ەسكە سالساق، جىل باسىنان باستاپ ق ر ءى ءى م كولىكتەگى ءى ءى د ۋچاسكەسىندە ەكى ەلدىڭ ازاماتتىعى بار 58 ادام اكىمشىلىك جاۋاپكەرشىلىككە تارتىلعان.