جۇرتشىلىقتىڭ پىكىرىنشە، مادەنيەت سالاسىنىڭ باسشىلارى مەن ونەر مايدانىندا جۇرگەن انشىلەر قاۋىمى ديماشتى قىتايعا بارىپ كەلگەننەن كەيىن عانا مويىنداي باستاعان.
بۇل تۋرالى Stan.kz حابارلايدى.
بۇل رەتتە ءانشى ايقىن تولەپبەرگەن ونەردەگى بارشا ارىپتەستەرىنىڭ اتىنان سىناۋشىلارعا جاۋاپ بەردى.
«سىزدەر (ونەر ادامدارى) ديماشتى قىتايعا بارعانعا دەيىن قولدامادىڭىزدار، بايقامادىڭىزدار» - دەگەن اڭگىمەگە ايتارىم... ديماشتى ءوزىم 2014-جىلدان بەرى تانيمىن. ينستا-پاراقشامدى سەنبەسەڭىزدەر، قاراپ شىعىڭىزدار. جانە ءارقاشان دا قولداپ، ونەرىنە ءتانتى بولىپ جۇردىك. ونەردەگى بارلىق اعا-اپكەلەرى دە ءدال سولاي.
اسىرەسە، قولداۋ كورسەتكەن مادەنيەت جانە سپورت مينيسترلىگى. «سلاۆيان بازارىن» ۇتىپ كەلگەن سوڭ (وعان دەيىن دە)، ۇلكەن-ۇلكەن ساحنالارعا، مەملەكەتتىك ماڭىزدى ءىس-شارالارعا شىعارىپ دەمەۋ كورسەتكەن دە مينيسترلىك، ونىڭ ىشىندە ارىستانبەك مۇحامەدي ۇلى مىرزا.
استاناداعى ديماشتىڭ ستاديوندا، الەمدىك دەڭگەيدەگى شوۋ-كونسەرتىنە دە تىكەلەي قولداۋ كورسەتكەن جوعارىدا ايتىلعان اعامىز.
سوندىقتان «قىتايعا بارماي تۇرىپ ەشكىمگە كەرەك بولمادى» - دەگەن بوس اڭگىمە. ديماشتاي، قايراتتاي، 91 توبىنداي جانە ت. ب. تالانتتى ىنىلەرىمىز بەن قولداۋشى اعالارىمىز امان بولسىن! جانە ەڭ باستىسى ونەر ادامدارىن وسىرەتىن دە، وشىرەتىن سىزدەر امان بولىڭىزدار، قۇرمەتتى كورەرمەن قاۋىم!» - دەپ جازدى ايقىن Instagram-داعى پاراقشاسىندا.
جەلى وقىرماندارىنىڭ ءبىراز بولىگى ايقىننىڭ پىكىرىنە قوسىلدى. كەي تىڭدارماندار ديماشپەن Ninety one توبىن قاتار اتاعانى ءۇشىن ايقىنعا ۇرسىپ تاستادى. ال ۇشىنشىلەر «ديماشتى دەر كەزىندە ارتىستەر ەمەس، حالىق باعالامادى» دەگەن پىكىرلەرىن ايتتى.