«جۇلدىزدار وتباسى» جۋرنالىنا بەرگەن سۇحباتىندا ايداي ءومىردىڭ باستى باقىتى انا بولۋ ەكەنىن جانە ىشكى جان دۇنيەڭ سۇلۋ بولماسا سىرتقى سۇلۋلىقتىڭ بوس ەكەنىن ايتتى دەپ حابارلايدى NUR. KZ.
«ءومىردىڭ ءمانى - بالادا ەكەن. ءسابيىم دۇنيەگە كەلگەننەن كەيىن مەن وسىنى ءتۇسىندىم، بالاما دەگەن ماحابباتىمدى سوزبەن ايتىپ جەتكىزە المايمىن. بالا باقىتتى بولۋى ءۇشىن انا باقىتتى بولۋى كەرەك. ەرلى-زايىپتىنىڭ اراسىنداعى كيكىلجىڭ، اناسىنىڭ رەنجۋى، كوڭىل-كۇيىنىڭ بولماۋى بالاعا قاتتى اسەر ەتەدى. ءتىپتى ودان بالا اۋىرىپ قالۋى مۇمكىن. سول ءۇشىن الدىمەن انالار باقىتتى بولۋى كەرەك»، - دەيدى ايداي.
2014-جىلى ەلىمىزدىڭ اتىنان «الەم ارۋى» بايقاۋىنا قاتىسقان ايداي دونالد ترامپتىڭ ماقتاۋىنان سوڭ، وزىنە سەنىمدىلىگى ويانعانىن ايتادى.
وندا سىرت كەلبەتىڭنەن بولەك مىنەزىڭە، ءجۇرىس-تۇرىسىڭا قاتتى قارايدى. الەمنىڭ ءار ەلىنەن كەلگەن ارۋلاردى قاراپ ءوزىمنىڭ ەشكىمنەن كەم ەمەس ەكەنىمدى ءتۇسىندىم. پرەزيدەنت دونالد ترامپ: «سەن راسىندا ادەمى ەكەنسىڭ»، - دەپ ايتقان كەزدە «دونالد ترامپتىڭ كوزىنە ءتۇستىم. دەمەك، ەڭ بولماعاندا ۇزدىك وندىقتىڭ ىشىنە كىرەتىن شىعارمىن»، - دەپ ويلادىم. وكىنىشكە وراي، ولاي بولمادى. دەگەنمەن مەن ورىن الا الماعانىما وكىنبەيمىن»، - دەيدى ول.
ايداي جارى ەكەۋى قايىرىمدىلىقپەن اينالىسادى، ولار اۋرۋ بالالارعا ارناپ قور اشقان.
«ماماندىعىم دارىگەر بولعاندىقتان شىعار مەن قاباعى اشۋلى، كوڭىل-كۇيى جوق قارتتاردىڭ، اشۋشاڭ ادامداردىڭ جانىنان الاڭسىز ءوتىپ كەتە المايمىن. ەگەر سونداي ادامداردى كورسەم جانىنا بارىپ، جاعدايىن بىلۋگە تىرىسامىن. بىلمەيمىن نەگە ەكەنىن ادامدارعا كومەكتەسكىم كەلەدى. سودان ءلاززات الامىن. قازىر جولداسىم ەكەۋمىزدىڭ «ماقسات ايداي فاۋندەيشن» دەگەن قايىرىمدىلىق قورىمىز بار. دتسپ مەن، باسقا دا ەمدەۋگە كەلمەيتىن ءبىر-ەكى ناۋقاس ادامدى شەتەلگە وقۋعا جىبەردىك. ءبىر ايدان استى. وزدەرىنىڭ دەرتىنىڭ سەبەبىن ءبىلۋ ءۇشىن وقىپ جاتىر. جانە ءار جىلدىڭ تامىز ايىندا بالالارعا قاراجات جاعىنان كومەكتەسەمىز»، - دەيدى قازاق ارۋى.
ەسكە سالساق، ايداي يسايەۆا «شىمكەنت ارۋى-2008»، «الماتى-2013 ەكىنشى ءميسسى»، «قازاقستان ارۋى-2013» جەڭىمپازى، «الەم ارۋى-2014» كونكۋرسىنىڭ قاتىسۋشىسى.