قوستانايدان قىتايعا ۇن ەكسپورتتالادى

استانا. قازاقپارات - قوستانايدا قىتايعا ۇننىڭ ءبىرىنشى پارتياسى جونەلتىلەدى، دەپ حابارلادى قوستاناي وبلىسىنىڭ كاسىپكەرلەر پالاتاسى.

شىلدە ورتاسىندا بەيجىڭدە «ءبىر بەلدەۋ - ءبىر جول» باعدارلاماسى اياسىندا وتكەن وتاندىق وندىرۋشىلەر جارمەڭكەسىندە قوستانايلىقتار جەرگىلىكتى شىعارىلعان تاۋاردى تانىستىرۋعا جانە ىسكەرلىك ارىپتەستەر تابۋعا مۇمكىندىك الدى.

قازاقستاندىق تاراپتان ىسكەرلىك ميسسيانى ۇيىمداستىرۋشى «اتامەكەن» ۇلتتىق كاسىپكەرلەر پالاتاسى بولدى. جارمەڭكەگە بارلىعى 13 وتاندىق ءوندىرۋشى، قوستاناي وبلىسىنان «قازتورگترانس» ۇن تارتۋ كاسىپورنى قاتىستى.

جارمەڭكەدە قوستانايلىق ونىمگە بىردەن قىتايلىق ءۇش كاسىپورىن قىزىعۋشىلىق تانىتتى. «ءبىز دامۋ ۇستىندەمىز جانە تيىسىنشە جاڭا ساۋدا نارىعىن ىزدەۋدەمىز. قىتاي باعىتىنا جول كوكتەمدە «اتامەكەننىڭ» قولداۋىمەن اشىلعان. ال جارمەڭكەدە ءوزىمىزدى تولىققاندى كورسەتە الدىق. قىتايدا ۇندى بەلگىلى ءبىر كۆوتا العان كومپانيالار عانا شىعارا الادى. قالعاندارىنان الىناتىن سالىق مولشەرى جوعارى. بۇل جەردە ءبىزدىڭ مۇددەمىز سايكەس كەلدى. ءونىمىمىزدى ەكسپورتتاۋ نيەتى تۋرالى مەموراندۋمعا قول قويدىق»، - دەدى «قازتورگترانس» ج ش س مەنەدجەرى ۆەرونيكا دەرەۆيانكو.

تامىزدا قوستانايلىقتار كەلىسىم جاساعان قىتايلىق فيرمالار ىنتىماقتاستىقتى تالقىلاۋ ءۇشىن وبلىسقا كەلەدى. وسىلايشا، ۇننىڭ ءبىرىنشى پارتياسى بيىل جونەلتىلەدى. «بۇعان دەيىن ءبىز وزبەكستانعا، تۇرىكمەنستانعا، اۋعانستانعا ەكسپورتتادىق»، - دەدى كاسىپكەرلەر.