بايكال مەن بۋدۋر الماتى زووباعىندا 20 جىلدان بەرى ءومىر ءسۇرىپ كەلەدى. بۋدۋر 20 جىل بۇرىن - ماسكەۋ زووباعىنان، بايكال - شىمكەنت زووباعىنان اكەلىنگەن.
20 جىلدان بەرى جانۋارلار توت باسقان تەمىر تورلى تار ۆولەردە ءومىر ءسۇرىپ كەلگەن. «ءبىزدىڭ دەمەۋشىلەر زووباعىمىزدىڭ كەزەكتى جۇبىنا جاڭا باسپانا سىيلادى. بۋدۋر مەن بايكال تۋعالى بەرى كوك مايسا مەن جەردى كورمەگەن. گيمالاي ايۋلارى اعاشقا ورمەلەگەندى جاقسى كورەدى. ءبىراق ولاردىڭ ەسكى ۆولەرىندە ونداي مۇمكىندىك بولمادى»، - دەدى زووباق ديرەكتورى ەرجان ەركىنبايەۆ.
ايۋلاردىڭ باسپاناسىندا قازىر ءبارى بار. تابيعي كوك ءشوپ توسەلگەن. شاعىن سۋات، اعاش، ويىنشىقتار بار.
«وتكەندە ءبىر وقيعا بولعان. كەلۋشىلەردىڭ ءبىرى ايۋلاردى وزىنە قاراتۋ ءۇشىن تاس اتقان. ەندى ونداي جاعدايدى بولدىرماۋ ءۇشىن ەكى اراعا اينەك ورناتىلدى. ەندى ولارعا ەشكىم تاس اتا المايدى. جوبا نەمىس مامانى پيتەر ازباحتىڭ كەڭەسىمەن جاسالدى. اۆتوماتتى جۇيە مەن ءۇش قاباتتى تريپلەكس پايدالانىلدى. قىستا ايۋلار ىشكى اپاندا ۇيىقتايدى، جازدا بەرگى جاعىندا جۇرەدى»، - دەدى جوبا اۆتورى سەرگەي سپيتسىن.
جاقىن ارادا الماتى زووباعىنداعى امۋر جولبارىستارىنا جاڭا باسپانانىڭ قۇرىلىسى باستالادى. قازىرگى تاڭدا ءمۇيىزتۇمسىقتاردىڭ ەكسپوزيتسياسى اياقتالىپ قالدى، پىلدەردىڭ توبەسى جابىلدى. ۆولەرلەردە تازالىق جۇمىستارى ءجيى جۇرگىزىلە باستادى.