قىتايلار قازاقتىڭ قويىن كوپتەپ الۋدى كوزدەيدى

استانا. قازاقپارات - بيىل قىتاي حالىق رەسپۋبليكاسى قازاقتىڭ قويىنا كوپتەپ تاپسىرىس بەردى.

الايدا قازاقستان ونداي تاپسىرىستى ازىرشە ورىنداي المايدى، دەپ حابارلايدى قازاقپارات ءتىلشىسى.

«نەگىزى، بىزگە اۋىل شارۋاشىلىعىن، سونىڭ ىشىندە تاماق ونەركاسىبىن بارىنشا دامىتقان ءتيىمدى. سەبەبى قازاقستاندا اۋىل شارۋاشلىعى جەرلەرى 200 ميلليون گەكتاردان اسادى. وسى مۇمكىندىكتى جان-جاقتى پايدالانۋ قاجەت. اۋىل شارۋاشىلىعى تاۋارلارىنا دا جوعارى سۇرانىس بولادى. ءبىز ونى انىق بايقاپ وتىرمىز. ءبىز كورشى قىتايعا ءجيى بارىپ تۇرامىز. ماسەلەن، بيىل ولار قوي ەتى بويىنشا بىزگە 160 مىڭ تونناعا تاپسىرىس بەرىپ وتىر. ەكىجاقتى كەلىسىمشارتتاردى قازىر-اق راسىمدەۋگە ءازىر. وكىنىشكە قاراي، ازىرشە ءبىز ونداي تاپسىرىستى ورىنداي المايمىز»، - دەيدى «اتامەكەن» ۇ ك پ باسقارما باسشىسىنىڭ ورىنباسارى نۇرجان التايەۆ.

ايتا كەتەيىك، بۇگىن استاناعى «كورمە» ورتالىعىندا وتاندىق تاۋار وندىرۋشىلەرىنىڭ «ۇلى دالا ەلى» اتتى كەزەكتى فورۋمنىڭ وتىرىسى باستالدى. فورۋم اياسىندا وتاندىق تاۋارلاردىڭ كورمەسى اشىلدى. وعان 350 كومپانيا قاتىسىپ جاتىر. كورمە اياسىندا شەتەلدىڭ ءىرى ەلەكتروندى ساۋدا پلاتفورمالارى العاش رەت ءوز ستەندتەرىن اشتى.