بۇل جايىندا ق ر س ءى م باسپا ءسوز قىزمەتىنىڭ جەتەكشىسى ءانۋار جايناقوۆ ءمالىم ەتتى، دەپ حابارلايدى قازاقپارات.
«مەندەگى بار اقپاراتقا سايكەس شىنىمەن دە قازاقستاندىق اكتەر قىتايدا اۋرۋحاناعا تۇسكەننەن كەيىن قايتىس بولدى. ونىڭ مۇردەسى قازاقستاننىڭ قىتايداعى ەلشىلىگى ديپلوماتتارىنىڭ كومەگىمەن ۇرىمجىدەن ەلگە جەتكىزىلدى. ۇرىمجىدەن زيمۋناي شەكارا وتكەلىنە دەيىن كولىك ۇيىمداستىرىلدى. مۇنان ارى شەكارادان مۇردەنى ونىڭ تۋىستارى كۇتىپ الىپ، جەرلەۋ ءۇشىن الىپ كەتۋى ءتيىس بولاتىن»، - دەدى ءانۋار جايناقوۆ.
ونىڭ ايتۋىنشا، اكتەر قىتاي شەكاراسىن كەسىپ وتكەن كەزدە ءوزىن جايسىز سەزىنگەن. ءبىراق، ول بۇعان قاراماستان ساپارىن ودان ارى جالعاستىرا بەرگەن.
قىتايدا ودان ارى ناشارلاپ، ەس-ءتۇسسىز قۇلاعان جانە قايتىس بولعان.
ايتا كەتەيىك، الەكسەي شۋمسكي مادەنيەت سالاسىنىڭ قىزمەتكەرلەرى كۇنى قارساڭىندا بيىلعى جىلدىڭ ۇزدىك اكتەرى اتاندى جانە قاراعاندى وبلىسى اكىمىنىڭ سىيلىعى مەن ديپلومىنا يە بولعان ەدى.