وتاندىق تاۋار وندىرۋشىلەر كورمە ايماعىنا سىيماي قالدى

استانا. قازاقپارات - بۇگىن استاناداعى «كورمە» ورتالىعىندا وتاندىق تاۋار وندىرۋشىلەرىنىڭ كورمەسى اشىلدى.

قازاقستاننىڭ كاسىپورىندارى 6000 شارشى مەترگە جۋىق اۋداندى الىپ تۇرعان ەكى بىردەي زالعا ورنالاستى، دەپ حابارلايدى قازاقپارات ءتىلشىسى.

ءبىرىنشى زالدا وسى ۋاقىتقا دەيىن «قازاقستاننىڭ ۇزدىك تاۋارى» اتاعىنا يە بولعان كومپانيالار ورنالاسسا، ەكىنشى زالدا وتاندىق ونىمدەردى شىعارىپ جاتقان باسقا دا كاسىپورىنداردىڭ تاۋارلارىن كورۋگە بولادى. جالپى، كورمەگە ەلىمىزدىڭ 350 كومپانياسى قاتىسىپ جاتىر. ولار كيىم-كەشەك، تاماق ونىمدەرى، قۇرىلىس ماتەريالدارى، توسەك-ورىن، ويىنشىقتار، اياق-كيىم، جيھاز، ءدارى-دارمەك، كوسمەتيكا، كىلەمدەر، ۇلتتىق كيىمدەر، قولونەر بۇيىمدارى، ەلەكتر جابدىقتار، حيميا تاۋارلارى، جىلىتۋ قازاندىقتارى، كىتاپتار مەن كوكونىس ونىمدەرىن الىپ كەلدى. ماشينا جاساۋ كاسىپورىندارى دا ءوز ماكەتتەرىن كورمەگە قويدى. كورمەدە وتاندىق تاۋارلاردى كورىپ قانا قويماي، ارزان باعاعا ساتىپ الۋعا دا بولادى.

ايتا كەتەيىك، بۇگىنگى شارالار تاۋار وندىرۋشەلىرىنىڭ «ۇلى دالا ەلى» اتتى III فورۋمى اياسىندا اشىلدى. فورۋم اياسىندا وسى سالاداعى وزەكتى ماسەلەلەردى تالقىلاپ، ۇزدىك كاسىپورىنداردى ماراپاتتاۋ جوسپارلانىپ وتىر.

بۇدان بولەك، مەنەدجمەنت پەن باسەكەلەستىكتى ارتتىرۋعا ارنالعان سەمينارلار ۇيىمداستىرىلادى. وتاندىق تاۋارلارلىڭ كورمەسى 30- شىلدەگە دەيىن جالعاسادى.