ەلدى شۋلاتقان قازاقستانداعى اتىشۋلى بەس قىلمىسكەر كىمدەر؟
NUR. KZ پورتالى ەل ەسىندە ۇزاق ۋاقىت ساقتالىپ قالعان اتىشۋلى بەس قىلمىسكەردى نازارلارىڭىزعا ۇسىنادى. ولاردىڭ جاۋىزدىقتارى ءالى كۇنگە دەيىن الەۋمەتتىك جەلىدە جانە حالىق اراسىندا ۇلكەن قورقىنىشپەن ايتىلادى. قاسكويلەردىڭ تانىمالدىعى سونشا عالامتوردىڭ ۆيكيپەدياسىنا كىرىپ، جاساعان قىلمىستارى حيكاياعا اينالعان.
تارازدىق جيحادشى
2011-جىلى 12- قاراشادا تارازدا بۇرىن-سوڭدى بولماعان جانتۇرشىگەرلىك وقيعا ورىن الدى. ءدىني ەكسترەميزم بويىنشا كۇدىك تۋدىرعان ماقسات قاريەۆ ءوزىن سىرتتاي اڭدىپ جۇرگەن ۇ ق ك- ءنىڭ ەكى وفيتسەرىن ولتىرەدى. كەيىن قارۋ ساتاتىن دۇكەنگە كەلىپ سول جەردە كۇزەتشىنى مەرت قىلىپ، تاعى ءبىر ادامدى اۋىر جارالايدى.
سوڭىنا ەكى پوليتسەيدى دە اتىپ ولتىرگەن. اقىرى ۇ ق ك د عيماراتىنا كەلىپ، عيماراتتى وقتىڭ استىنا الادى. تەك تۇسكى ساعات ۇشتەر شاماسىندا جول پوليتسياسىنىڭ جەكە باتالونى قىزمەتكەرلەرى ونى قولعا ءتۇسىردى.
سول كەزدە جانكەشتى ماقسات قاريەۆ ءوز-ءوزىن جارىپ جىبەرىپ، قاسىندا تۇرعان پوليتسيا كاپيتانى بايتاسوۆ تا كوز جۇمعان. جالپى، وقيعا سالدارىنان 7 ادام قازا تاپقان ەدى.
«ارقانكەرگەن» وقيعاسى
ارقانكەرگەندەگى وقيعا 2012-جىلى مامىردىڭ 30 ى كۇنى ءمالىم بولدى. سول كۇنى «شىعىس» ايماقتىق شەكارا قىزمەتى ءۇشارال وتريادىنىڭ سارىبوكتەر زاستاۆاسىندا 12 شەكاراشى جانە ءبىر قورىقشى، ال ءبىرىنشى ماۋسىمدا تاعى ەكى شەكاراشىنىڭ - بارلىعى 15 ادامنىڭ ءمايىتى تابىلعان. ۇ ق ك شەكارا قىزمەتىنىڭ مالىمەتىنە قاراعاندا، زاستاۆاداعى ارقانكەرگەن پوستىنىڭ عيماراتى ورتەنگەن.
ءتىرى قالعان جالعىز شەكاراشى - 19 جاستاعى ۆلاديسلاۆ چەلاح ماۋسىمنىڭ بەسىندە ۇستالدى. ماۋسىمنىڭ جەتىسىندە چەلاحتىڭ «سەرىكتەرىن ولتىرگەنىن» مويىنداعانى تۋرالى حابارلاندى. چەلاحتىڭ تۋىستارى وعان سەنبەيتىندەرىن ايتتى.
ۆلاديسلاۆ چەلاح تەرگەۋشىلەرگە قىلمىستىڭ قالاي بولعانىن كورسەتۋدە.
2012-جىلى قازاننىڭ ءبىرى كۇنى «ارقانكەرگەن بەكەتىندەگى 14 شەكاراشى مەن ورمانشىنىڭ ولىمىنە كىنالى» دەپ قاماۋعا الىنعان ۆلاديسلاۆ چەلاحقا «ەكى جانە ودان دا كوپ ادامدى ءولتىردى»، «اسكەري قىزمەتتەن قاشتى»، «اسكەري مۇلىكتى زاقىمدادى»، «اسكەري قارۋدى ۇرلادى»، «ورمانشى مەن كومانديردىڭ جەكە مۇلكىن ۇرلادى» جانە «بوتەن كىسىنىڭ ۇيىنە زاڭسىز كىردى» دەگەن ايىپپەن، ءومىر بويىنا سوتتالىپ كەتتى.
اتىشۋلى چەلاح قازىر قوستانايداعى «قارا بۇركىت» تۇرمەسىندە جازاسىن وتەپ جاتىر. تۋىستارىنىڭ سوزىنشە، قاندى قول قاراقشى ارقانكەرگەندەگى قىرعىن جايلى كىتاپ جازۋدى ارمانداپ ءجۇر.
قاۋىپتى كۇلەكبايەۆ
2016-جىلى 18- شىلدەدە الماتىنىڭ قاق ورتاسىندا نەبارى 24 مينۋتتا ورىن العان قاندى قىرعىننان 10 ادام قازا تاپقان ەدى. قولىنا قارۋ الىپ 8 قۇقىق قورعاۋ قىزمەتكەرى مەن 2 بەيبىت تۇرعىندى جەر جاستاندىرعان رۋسلان كۇلەكبايەۆتىڭ اتى ءالى كۇنگە ەل ەسىندە.
سالافيزمنىڭ جەتەگىندە كەتىپ، 10 وتباسىنى قان جىلاتقان قاراقشى بۇل ىسىنە وكىنبەيتىنىن ايتىپ، جاساعان قىلمىسىن «اللاعا قارسىلاردىڭ كوزىن جويدىم» دەپ ماساتتانعان ەدى. 2016-جىلى ەكىنشى قاراشادا سوت وتىرىسى ءوتىپ، ەڭ العاش رەت اتىشۋلى لاڭكەسكە ءولىم جازاسى كەسىلدى. قاۋىپتى كۇلەكبايەۆ قاماۋعا الىنسا دا حالىقتىڭ قورقىنىشى سەيىلمەدى.
سەبەبى، ونىڭ لاڭكەستىك شابۋىلىنان كەيىن الماتىدا قاۋىپسىزدىكتىڭ «قىزىل» دەڭگەيى جاريالاندى. قازىر رۋسلان كۇلەكبايەۆ ۆلاديستاۆ چەلاح وتىرعان «قارا بۇركىت» تۇرمەسىندە ءولىم جازاسىن كۇتۋدە.
«ءالىبي ءىسى» نەمەسە توقالعا تالاس
2015-جىلى 24- ساۋىردە الەۋمەتتىك جەلىدە بەتى اۋزىنىڭ ساۋ تامتىعى قالماعان 24 جاستاعى ءالىبي جۇماعۇلوۆتىڭ سۋرەتى ءدۇيىم جۇرتتى ءدۇر سىلكىندىرگەن ەدى.
كەيىن بەلگىلى بولعانداي جاس جىگىتتى يتشە تەپكىلەگەن استاناداعى تانىمال كاسىپكەر قايرات جاماليەۆ پەن ونىڭ سىبايلاستارى بولىپ شىقتى. وقيعا حالىق اراسىندا ۇلكەن رەزونانس الىپ، ءتىپتى «ءالىبي ءىسى»، «توقالعا تالاس» دەگەن اتپەن تاراپ كەتتى.
سەبەبى، كاسىپكەردىڭ ءالىبيدى ءولىم-ءىشى ەتىپ ساباۋعا توقالى اينۇر يسينانىڭ قيسىق ءجۇرىسى تۇرتكى بولعان. وسىلايشا جارتى جىلعا قىزۋ تالقىعا تۇسكەن وقيعاعا 2015-جىلدىڭ شىلىڭگىر شىلدەسىندە نۇكتە قويىلدى.
استاناداعى مامانداندىرىلعان اۋدانارالىق قىلمىستىق ىستەر جونىندەگى سوتتىڭ شەشىمى بويىنشا، كاسىپكەر قايرات جاماليەۆ 13 جىلعا سوتتالدى، ال سىبايلاستارى 12 جانە سەگىز جىل ارقالادى. ولار جازالارىن قاتاڭ رەجيمدەگى كولونيادا وتەپ جاتىر.
سونىمەن بىرگە، بيزنەسمەننىڭ بار مۇلكى تاركىلەنەدى. ءوزىن جازىقسىز سانايتىن قايرات جۇماعۇلوۆ ءالى كۇنگە دەيىن جوعارعى سوتقا ارىز ءتۇسىرىپ، جازاسىن جەڭىلدەتۋدى سۇراپ ءجۇر.
سىرا پاتشاسى
شىمكەنتتىك سىرا پاتشاسىنىڭ قىلمىستىق حيكاياسىمەن جاۋىزدىقتارى ءالى كۇنگە دەيىن ەل اۋزىندا. توقتار تولەشوۆ باستاعان رەكەتتەر وڭتۇستىك قازاقستان وبلىسىن الاقانىندا ۇستاۋ ءۇشىن «قىرعىن مايدان» جۇرگىزگەن.
ولار «جابايى ارمان»، «ەسكى بانداسىمەن» قيان-كەسكى كۇرەسىپ، قارسىلاستارىن قيناعان، ءولىمشى ەتىپ سوققىعا جىققان، ولتىرگەن. ءتىپتى قىلمىستارىن قىمسىنباي ۆيدەوعا ءتۇسىرىپ، وزگەلەردى قورقىتقان.
ساياسي امبيتسياسى شەكتەن شىققان تولەشوۆ قازاقستانداعى بيلىكتى باسىپ الۋدى ارمانداپ قانا قويماي، ەلدەگى نەبىر بۇلىكتى ۇيىمداستىرعان بولىپ شىقتى. مەملەكەتتىك توڭكەرىس جاساماق بولعان بيزنەسمەننىڭ بار بىلىعى اشكەرە بولىپ، وعان قىلمىستىق كودەكستىڭ 15- بابى بويىنشا ايىپ تاعىلدى. ول 2016-جىلدىڭ جەتىنشى قاراشاسىندا 21 جىلعا باس بوستاندىعىنان ايىرىلىپ، بۇگىنگى كۇنى جازاسىن تۇرمەدە وتەپ جاتىر.
ايتا كەتەيىك، 21 بالاسى، ءتورت ايەلى بار «سىرا پاتشاسىنىڭ» Mitsubishi, Bentley, Toyota Land Cruiser (ەكى كولىك)، Chevrolet (9) ، Mercedes, Porsche Cayenne, Toyota Camry (2) ، BMW، Volkswagen Passat, Toyota Land Cruiser Prado (2) ، Infiniti, Rolls-Royce, Lexus كولىكتەرى تاركىگە الىندى.
سونداي-اق زەرگەرلىك بۇيىم ازىرلەيتىن قۇرىلعىلار (22 نىسان)، كارتا شوتىنداعى قاراجات، زەرگەرلىك اشەكەيلەر (183 دانا)، ەرلەرگە ارنالعان $68 مىڭ تۇراتىن ساعات، 855 ەۋرو، 1370 رۋبل جانە وزگە شەتەلدىك ۆاليۋتا، «دارحان Group» ج ش س اتىنان تىركەلگەن جەر ۋچاسكەلەرى بار 10 جەكە ءۇي جانە شىمكەنتتەگى ەكى تۇرعىن ءۇي مەملەكەت قازىناسىنا ءوتتى.