گولليۆۋد اكتەرى دجون مالكوۆيچ: قازاقستاندى قۋانا- قۋانا ارالاپ كورەر ەدىم

استانا. قازاقپارات - «ەۋرازيا» حالىقارالىق فەستيۆالىنە ارنايى كەلگەن گولليۆۋد اكتەرى دجون مالكوۆيچ قازاقستاندى ارالاپ شىققىسى كەلەتىنىن ايتتى، دەپ حابارلايدى «قازاقپارات» ح ا ا ءتىلشىسى.

بۇگىن قازاق ۇلتتىق ونەر ۋنيۆەرسيتەتىندە گولليۆۋد اكتەرى دجون مالكوۆيچ ب ا ق وكىلدەرىمەن باسپا ءسوز ءماسليحاتىن وتكىزدى. كۇنى كەشە عانا شەتەلدىك قۇرمەتتى مەيمان «ەكسپو-2017» كورمەسىن ارالاپ قايتقان بولاتىن. حالىقارالىق كورمەدەن العان اسەرىمەن بولىسكەن اكتەر قازاقستان جانە فرانتسيا پاۆيلوندارىندا بولعان.

«كورمەنى تاماشالاۋ ءۇشىن كوپ ۋاقىتىم بولعان جوق. دەگەنمەن، كورگەندەرىم مەنى كەرەمەت تامساندىردى. كورمەنىڭ ساۋلەتى كەرەمەت. ءوزىم دە ساۋلەت سالاسىن زەرتتەپ جۇرگەندىكتەن، كورمە مەنى ەرەكشە قىزىقتىردى. ءبىز قازاقستاننىڭ پاۆيلونىندا بولدىق. «ەكسپو-2017» كورمەسى بولاشاق ەنەرگياسى ماسەلەسىن كوتەرىپ جاتقانىن بىلەمىن. ءبىر سوزبەن ايتقاندا، ءبارى كەرەمەت. روبوتتار كورمەسىن تاماشالادىم. قازاقستان ماعان وتە ۇنايدى. ەكى قالادا - الماتى مەن استانادا بولدىم. قازاقستاندى قۋانا- قۋانا ارالاپ شىعار ەدىم. 6-8 جىل بۇرىن دوسىم ارالاپ شىققان. سوندىقتان، مەنىڭ دە قازاقستاندى ارالاپ شىعۋىم مۇمكىن»، دەدى گولليۆۋد اكتەرى.

مالكوۆيچ وسىمەن قازاقستانعا ەكىنشى رەت كەلىپ وتىر. 2010 -جىلى ول الماتى قالاسىندا بولعان. اكتەر ەلگە كەلمەي تۇرىپ، قازاقستاننىڭ تاريحىن اقتارىپ شىققان.

اۆتور: ايان بەكەن ۇلى