وققاعار، ليۋكس، بولمە، ۇشاق، كولىك: قايراتتى شەتەلگە شاقىرتۋشىلارعا قويىلاتىن نەگىزگى تالاپتار بەلگىلى بولدى

استانا. قازاقپارات - ەلىمىزدەگى توي جۇلدىزدارىنىڭ كوشىن باستاپ تۇرعان قايرات نۇرتاس ەندى ەۋروپا تويلارىن باعىندىرۋعا بەتتەگەن سەكىلدى.

كۇنى كەشە ءانشىنىڭ اناسى ءارى پروديۋسەرى قايراتتىڭ يتالياعا اتتانعالى جاتقانىن ايتىپ ماقتاندى.

ال قايراتتىڭ ءوزى الەۋمەتتىك جەلىدەگى پاراقشاسىندا يتاليانىڭ پيسا قالاسىندا، جاعاجايدا دەمالىپ جاتقان سۋرەتتەرىن جۇكتەپ ۇلگەردى. بۇل جاعىمدى جاڭالىقتىڭ ءمان-جايىن بىلمەك بولىپ، Stan.kz ءتىلشىسى ءانشىنىڭ ديرەكتورىنان سۇحبات الدى.

قايراتتى ارنايى يتالياعا الدىرتقان سوندا تۇراتىن قانداستارىمىز بولىپ شىقتى. بۇل جولعى توي -  تۋعان كۇن مەرەكەسى. قايراتتىڭ ديرەكتورىنىڭ ايتۋىنشا، بۇل ءانشىنى الىس شەتەلگە العان العاشقى شاقىرۋى ەمەس. سوندىقتان يتاليادان قوڭىراۋ شالىپ، قولقا سالعاندا، اسا تاڭ قالماعاندارىن ايتادى.

«بۇعان دەيىن قايراتتى فرانسياعا تويعا شاقىرعان. ءبىراق اتالعان كۇن بوس بولماعاندىقتان، باس تارتۋعا تۋرا كەلدى»، - دەيدى قايراتتىڭ ديرەكتورى.

سونىمەن قاتار، جۇلدىزى اسقاقتاپ تۇرعان ءانشىنى ەۋروپاعا شاقىرتۋ قۇنى قازاقستان قالالارىنداعى تويلاردان الدەقايدا جوعارى ەكەنىن ايتتى. مۇنىسى تۇسىنىكتى دە. بۇل جولعى تاپسىرىس بەرۋشىلەر انشىگە تويدا اننەن شاشۋ شاشىپ قانا قويماي، قىمبات قوناق ۇيلەردىڭ بىرىندە 4 كۇن دەمالۋدى وزدەرى ۇسىنىپتى.

وعان قوسا، قايراتتىڭ بۇل جولعى رايدەرى دە بولەك. بيزنەس- كلاسس، وققاعارلار، ليۋكس كولىك، ارنايى گيد، وعان قوسا، شاش-باۋىن كوتەرىپ جۇرەتىن توبى دا بار. الىس ساپارعا جالعىز اتتانعاندىقتان، سوڭعىلارى ءانشىنى ارنايى كەلىپ الىپ كەتسە كەرەك.

سونىمەن، توي شىلدەنىڭ 27 نە بەلگىلەنگەن ەكەن. ال ازىرگە قايرات يتاليا اسپانىنىڭ استىندا دەمالۋدا.

وسى ورايدا، قايرات نۇرتاستىڭ تويلارعا شىعاتىن نەگىزگى رايدەرىن اتاپ كەتكەن ورىندى. قايراتتى جەكە مەرەكەڭىزگە شاقىرعىڭىز كەلسە: وزىنە ۇشاقتان بيزنەس-كلاسس، ال كومەكشىسىنە -  ەكونوم قۇنىن تولەۋ كەرەك. ورنالاساتىن قوناق ءۇيىنىڭ جۇلدىزى بەستەن كەم ەمەس، بولمەسى مەن توسىپ الاتىن كولىك تەك ليۋكس بولۋى شارت. ودان قالسا قايرات نۇرتاستى جۇرتتىڭ شابۋىلداۋى مەن مازاسىن الۋىنان قورعايتىن وققاعارلار قاسىندا ءجۇرۋى مىندەتتى.